Wildberries O‘zbekistonda WB Taxi xizmatini yo‘lga qo‘yadi

Wildberries kompaniyasining O‘zbekistondagi sho‘ba korxonasi WB Int Export mamlakatda WB Taxi xizmatini tashkil etish maqsadida yangi kompaniyani ro‘yxatdan o‘tkazdi. Bu haqda Zamin.uz xabar berdi.

Bu haqda Kursiv Uzbekistan xabar berdi. Mazkur kompaniya 2023-yil iyun oyida davlat ro‘yxatidan o‘tgan.

Rasmiy ma’lumotlarga ko‘ra, WB Taxi taksi xizmatlarini ko‘rsatishni rejalashtirgan. Kompaniyaning ustav fondi 500 ming so‘mni tashkil etadi.

Unda asosiy ulush, ya’ni 99 foiz WB Int Export’ga tegishli bo‘lsa, qolgan 1 foiz ulush RVB MChJga tegishli. RVB MChJ Wildberries va Russ Outdoor tashqi reklama operatorining birlashuvi natijasida tashkil etilgan.

Kursiv Uzbekistan gazetasi kompaniyadan qo‘shimcha ma’lumot olish uchun so‘rov yuborgan. Shu bilan birga, WB Taxi xizmatining dastlabki sinov jarayonlari Belarusda amalga oshirilayotganini ma’lum qilgan.

Belarusda ushbu xizmatga oid mobil ilovalarni yuklab olish imkoniyati allaqachon yaratilgan. Shuningdek, 2023-yil oktabr oyida Wildberries kompaniyasining Moskva shahrida yo‘lovchi tashish bozoriga kirishi rejalashtirilayotgani haqida xabarlar tarqaldi.

Ayrim manbalarga ko‘ra, kompaniya Sitimobil xizmatini sotib olishni ko‘zlamoqda. Bundan tashqari, Wildberries jamoasiga Gett va Bibi taksi agregatorlarining sobiq rahbari Anatoliy Smorgonskiy qo‘shilgan.

U WB Taxi bo‘linmasini boshqarishga mas’ul etib tayinlangan.