Rossiya ayollarini erta farzand ko‘rishga undamoqda

Rossiya Federatsiyasi parlamentining yuqori palatasi — Federatsiya kengashi raisi Valentina Matviyenko mamlakat ayollarini 18 yoshdan boshlab farzand ko‘rishga undadi. Bu haqda Zamin.uz xabar berdi.

U bu haqda “Moskovskiy komsomoles” gazetasiga bergan intervyusida o‘z fikrlarini bildirgan. Matviyenko demografik vaziyatni yaxshilash uchun ayollar mentalitetini o‘zgartirish kerakligini ta’kidladi.

Uning so‘zlariga ko‘ra, katta va barqaror oila qadriyatga aylanishi lozim. U ayollarning farzand ko‘rishni kechiktirmasligini, voyaga yetgach tug‘ishni odat qilishlari kerakligini aytgan.

Shuningdek, u farzand ko‘rishni ortga surish tibbiy yoki boshqa sabablarga ko‘ra imkoniyatni yo‘qotishga olib kelishi mumkinligini qayd etdi. 76 yoshli Matviyenko bir nafar farzandning onasi bo‘lib, uni 24 yoshida dunyoga keltirgan.

Uning bu chaqirig‘i Rossiyada demografik inqiroz fonida yangragan. Statistikaga ko‘ra, 2025-yil boshiga kelib Rossiya aholisi 146 milliondan biroz kamroqni tashkil etdi, bu esa o‘tgan yilga nisbatan pasayishni ko‘rsatadi.

Tadqiqotlar shuni ko‘rsatadiki, 2045-yilga kelib Rossiya aholisi 130 milliongacha qisqarishi mumkin. Ba’zi prognozlarga ko‘ra, 2100-yilga borib bu ko‘rsatkich 74 milliongacha tushib ketishi ehtimoldan holi emas.

Rossiya rahbariyati bu demografik muammolarni hal qilish maqsadida aholiga erta farzand ko‘rishni targ‘ib qilmoqda. Prezident Vladimir Putin ham bu masalaga e’tibor qaratib, farzand ko‘rishni kechiktirishni tanqid qilgan.

U o‘qish yoki karyera ortidan quvish sababli onalik va otalikni kechiktirish noto‘g‘ri ekanini ta’kidlagan. Putinning farmoniga ko‘ra, 2030-yilgacha tug‘ilish koeffitsiyenti 1,6 nafarga, 2036-yilgacha esa 1,8 nafarga yetkazilishi lozim.

Bu kabi chora-tadbirlar orqali mamlakatda demografik inqirozni bartaraf etish rejalashtirilmoqda.