Rossiya ayollarni erta farzand ko‘rishga undamoqda
Rossiya Federatsiyasi parlamentining yuqori palatasi – Federatsiya Kengashi raisi Valentina Matviyenko mamlakat ayollarini 18 yoshdan boshlab farzand ko‘rishga undadi. Bu haqda Zamin.uz xabar berdi.
Uning fikricha, demografik muammolarni hal qilish uchun avvalo jamiyat dunyoqarashini o‘zgartirish zarur. Matviyenkoning ta’kidlashicha, ayollar voyaga yetgan zahoti farzandli bo‘lishni odatiy holga aylantirish kerak.
U muvaffaqiyat tushunchasini qayta ko‘rib chiqish lozimligini aytib, katta va mustahkam oilaga ega bo‘lishni haqiqiy muvaffaqiyat deb hisoblash kerakligini ta’kidladi. Parlament spikeri ayollarni farzandli bo‘lishni ortga surmaslikka chaqirib, tibbiy yoki boshqa sabablarga ko‘ra keyinchalik bu imkoniyatni yo‘qotish xavfi borligini eslatdi.
Ushbu chaqiriqning asosiy sababi Rossiyada yuzaga kelgan demografik inqirozdir. Statistik ma’lumotlarga ko‘ra, mamlakat aholisi yil sayin kamaymoqda.
Masalan, 2045 yilga borib Rossiya aholisi 138,8 million kishiga qisqarishi mumkin. Ba’zi mutaxassislar esa 2100 yilga kelib bu ko‘rsatkich 74 million kishigacha tushishini prognoz qilmoqda.
Bu holat mamlakat iqtisodiyoti va ijtimoiy barqarorligiga jiddiy xavf tug‘diradi. Shu sababli, Rossiya rahbariyati aholini erta farzand ko‘rishga rag‘batlantirishga katta e’tibor qaratmoqda.
Prezident Vladimir Putin ham yoshlarga murojaat qilib, ta’lim yoki kar’era sababli farzandli bo‘lishni kechiktirmaslikni tavsiya qilgan. Hukumatning maqsadi tug‘ilish ko‘rsatkichlarini oshirish bo‘lib, 2030 yilga borib bu ko‘rsatkichni 1,6 nafarga, 2036 yilga kelib esa 1,8 nafarga yetkazish rejalashtirilgan.
