Atlanta aeroporti dunyodagi eng gavjum aeroport bo‘ldi
Dunyodagi eng gavjum xalqaro aeroportlar ro‘yxati e’lon qilindi. Bu haqda Zamin.uz xabar berdi.
Bu ro‘yxatda AQShning Jorjiya shtatida joylashgan Atlanta—Hartsfild-Jekson aeroporti yetakchilikni yana bir bor qo‘lga kiritdi. 2024-yil yakunlariga ko‘ra, ushbu aeroport 108 milliondan ortiq yo‘lovchiga xizmat ko‘rsatib, rekord natijaga erishdi.
Atlanta aeroportining bunday yuqori natijalarga erishishiga bir qator omillar sabab bo‘lgan. Birinchidan, aeroport AQSh hududining 80 foiz qismiga 2–3 soatlik parvoz masofasida joylashgan.
Shuningdek, bu aeroportdan dunyoning 225 ta shahriga to‘g‘ridan to‘g‘ri reyslar amalga oshiriladi. Antarktidadan tashqari barcha qit’alarga parvozlar mavjud.
Aeroport trafigining katta qismi, ya’ni taxminan 85 foizi ichki reyslarga to‘g‘ri keladi. Atlanta aeroportida dunyodagi eng yirik avtomatlashtirilgan bagaj tizimi faoliyat yuritadi.
100 kilometr uzunlikdagi konveyerlar bir soat ichida 60 mingta jomadonni saralash quvvatiga ega. Yo‘lovchilar terminallar o‘rtasida SkyTrain tezyurar poyezdi orqali harakatlanadilar.
Reytingning ikkinchi o‘rnida Dubay xalqaro aeroporti joylashgan bo‘lib, u 2024-yilda 92,3 million yo‘lovchiga xizmat ko‘rsatgan. Keyingi o‘rinlarda AQShning Dallas/Fort-Uert aeroporti (85 million yo‘lovchi), Tokiodagi Haneda va Londonning Hitrou aeroportlari qayd etilgan.
Yuk tashish bo‘yicha yetakchilik esa Gonkong xalqaro aeroportiga tegishli bo‘lib, u bir yil ichida 5 million tonnadan ortiq yukni qayta ishlagan.
