Imron Xonning o‘limi haqidagi xabar tasdiqlanmadi
Afg‘onistonning ayrim ommaviy axborot vositalari 26-noyabr kuni Pokistonning sobiq bosh vaziri Imron Xonning Adiala qamoqxonasida vafot etgani haqida xabar tarqatdi. Bu haqda Zamin.uz xabar berdi.
Ushbu xabar qo‘shni mamlakatda katta shov-shuvga sabab bo‘ldi. Manbalarning ma’lumotiga ko‘ra, siyosatchi “sirli tarzda” hayotdan ko‘z yumgan va uning jasadi qamoqxona hududidan olib chiqilgan.
Biroq bu ma’lumot hozircha tasdiqlanmagan. Pokiston hukumati, Adiala qamoqxonasi ma’muriyati va Imron Xon yetakchilik qilgan Pokiston Texrik-ye-Insaf (PTI) partiyasi bu xabarni rasmiy ravishda tasdiqlamagan.
Xalqaro axborot agentliklari ham bu borada hech qanday rasmiy bayonot bermadi. Shu sababli vaziyatning aniqligi hozircha noma’lumligicha qolmoqda.
Mazkur xabar tarqalganidan so‘ng ijtimoiy tarmoqlarda faollik oshdi. Imron Xonning tarafdorlari va unga yaqin fuqarolar qamoqxona oldida to‘planayotgani haqida xabarlar paydo bo‘ldi.
Eslatib o‘tish kerak, Imron Xon bir necha jinoyat ishi bo‘yicha sudlangan va qamoqqa olingan edi. So‘nggi yillarda uning sog‘lig‘i yoki o‘limi haqida bir necha bor yolg‘on xabarlar tarqalgan, biroq ular keyinchalik rasman rad etilgan.
Hozirgi vaqtda xabarning haqqoniyligi noma’lum. Rasmiy idoralardan tasdiq yoki rad etish kutilmoqda.
Pokiston jamoatchiligi esa ushbu masalaga oydinlik kiritilishini talab qilmoqda.
