Tueyts muzligi erishi global xavfni kuchaytirmoqda

Antarktidadagi Tueyts muzligi, boshqa nomi bilan "Qiyomat kuni muzligi", tezlik bilan erib bormoqda va bu olimlarni jiddiy xavotirga solmoqda. Bu haqda Zamin.uz xabar berdi.

Tadqiqotlarga ko‘ra, agar ushbu ulkan muz qatlami butkul parchalansa va okeanga tushib ketsa, dengiz sathi 1–2 metrga ko‘tarilishi mumkin. Bu holat Nyu-York, London, Amsterdam, Bangkok va Mumbay kabi yirik shaharlarning suv ostida qolish xavfini oshiradi.

Nature Geoscience jurnalida chop etilgan tadqiqotda qayd etilishicha, muzlikda yoriqlar soni so‘nggi yillarda keskin ko‘paygan. Mutaxassislarning fikriga ko‘ra, muz ostida shakllangan girdoblar iliq suv oqimlarini tortib, muzning erish jarayonini tezlashtirmoqda.

Ma’lumotlarga ko‘ra, 1980-yillardan beri Tueyts muzligi 600 milliard tonnadan ortiq muzni yo‘qotgan. Global isish davom etayotgan bir paytda, bunday jarayonlar Antarktidaning boshqa hududlarida ham kuzatilishi mumkin.

Tueyts muzligi kengligi 120 kilometr, umumiy maydoni esa 190 ming kvadrat kilometrni tashkil etadi. Bu hudud deyarli AQShning Florida shtati bilan teng.

Muzlikning yo‘qolishi nafaqat yirik shaharlarga, balki Maldiv orollari, Tuvalu, Kiribati va Polineziya kabi past joylashgan davlatlarga ham halokatli ta’sir ko‘rsatishi mumkin. Olimlar 2025-yil boshlarida muzlik ostidagi shelf qatlami kelgusi o‘n yil ichida yemirilishi ehtimolini allaqachon ogohlantirgan edilar.

Bu jarayon global ekologik muvozanatga jiddiy xavf tug‘diradi.