Rossiyalik olimlar Mars tuprog‘ida arpa yetishtirdi
Rossiyalik olimlar Mars sharoitiga yaqin muhitda arpa yetishtirish bo‘yicha muvaffaqiyatli tajriba o‘tkazdi. Bu haqda Zamin.uz xabar berdi.
Ular sun’iy ravishda tayyorlangan “Mars tuprog‘i”ga 10 xil bakteriya va xamirturushdan iborat mikroorganizmlar aralashmasini qo‘shgan. Ushbu aralashma bir-birini qo‘llab, unumdor qatlam hosil qilgan va natijada tuproq hayot uchun yaroqli muhitga aylangan.
Tajriba davomida arpa ko‘chatlari barqaror o‘sish ko‘rsatgan. Olimlarning ta’kidlashicha, biologik faol moddalar qattiq va hosilsiz muhitni “tiriltirish”da muhim ahamiyatga ega.
Tajribada foydalanilgan mikroorganizmlar avval “Bion-M” №2 kosmik apparati yordamida Yer orbitasiga chiqarilib, maxsus sharoitlarda sinovdan o‘tkazilgan va keyin Yerga qaytarilgan. Hozirda olimlar bu mikroblarning kosmosdagi o‘zgarishlarini, genetik va biologik reaksiyalarini chuqur o‘rganmoqda.
Mazkur ilmiy ishlar kelajakda Mars yoki boshqa sayyoralarda hayotni saqlash, o‘simlik yetishtirish va inson ekspeditsiyalarini qo‘llab-quvvatlashda muhim ahamiyat kasb etishi mumkin. Bu tajriba insoniyatning kosmik tadqiqotlar sohasidagi imkoniyatlarini kengaytirish yo‘lida muhim qadam hisoblanadi.
