Vafot etgan onasi nomidan pensiya olgan erkak qo‘lga olindi

Italiyada 57 yoshli erkak uch yil davomida vafot etgan onasining pensiyasini noqonuniy ravishda olgani fosh etildi. Bu haqda Zamin.uz xabar berdi.

CNN xabariga ko‘ra, erkak 2022-yilda 82 yoshida vafot etgan onasi Graziella Dall’Oglio qiyofasiga kirib, yangi pasport rasmiylashtirish uchun davlat idorasiga borgan. U ayolning kiyimlarini kiyib, bo‘yanish va parikdan foydalangan holda onasining tashqi ko‘rinishini takrorlashga harakat qilgan.

Ammo hujjatlarni rasmiylashtiruvchi xodim erkakning harakati, yurishi va ovozidan shubhalanib, politsiyaga murojaat qilgan. Kuzatuv kameralarida "marhuma" avtomobil boshqargani aniqlangan, holbuki, ayolning haydovchilik guvohnomasi bo‘lmagan.

Politsiya erkakni darhol qo‘lga olgan. Tekshiruv davomida erkak yashagan xonadondan onasining mumiyolangan jasadi topilgan.

U jasadni kir yuvish xonasidagi shkafda maxsus qoplarga o‘rab saqlagan. Erkak tergov chog‘ida jasadni chirishdan saqlash uchun maxsus usullar qo‘llaganini tan olgan.

U jasadni yashirish, davlatni aldash, soxta hujjatlar tayyorlash va boshqa shaxs qiyofasiga kirishda ayblanmoqda. Italiya politsiyasi mamlakatda marhumlar nomidan pensiya olishga urinish holatlari kam emasligini, reestrlar o‘rtasidagi ma’lumot almashinuvidagi kechikishlar firibgarlikka imkon yaratishini ta’kidlamoqda.