Dunyodagi eng qimmat shaharlar reytingi e’lon qilindi
2025 yilga kelib dunyoning yirik shaharlarida turar joy bozori keskin o‘zgarishlarga yuz tutdi. Bu haqda Zamin.uz xabar berdi.
Ayniqsa, kondominiumlar segmentida narxlar jadal o‘sib, ko‘plab hududlarda aholining xarid imkoniyatidan ancha yuqori darajaga yetdi. Numbeo portali tomonidan e’lon qilingan reyting dunyodagi eng qimmat 10 shaharni aniqladi.
Bu yilgi natijalarda Shveysariya shaharlarining ko‘pligi alohida e’tiborni tortdi. Ushbu TOP-10 ro‘yxatida beshta Shveysariya shahri joy oldi.
Reytingning birinchi pog‘onasida Hongkong turibdi. Bu shaharda turar joyning har bir kvadrat metri o‘rtacha 25 339 dollarni tashkil etadi.
Hongkongning uzoq yillardan beri yetakchi o‘rinni egallab kelishi bir nechta omillar bilan bog‘liq. Ularga yer maydonining cheklanganligi, aholi zichligi, rivojlangan infratuzilma va Osiyodagi eng yirik moliyaviy markazlardan biri sifatidagi mavqei kiradi.
Ikkinchi va uchinchi o‘rinlarda Shveysariya shaharlaridan Syurix (1 kvadrat metr uchun 24,8 ming dollar) va Lozanna (22,9 ming dollar) joylashgan. To‘rtinchi o‘rinni Osiyoning rivojlangan markazlaridan biri — Singapur egalladi.
Bu yerda kvadrat metr narxi o‘rtacha 22,5 ming dollarni tashkil etadi. Beshinchi pog‘onada esa Shveysariyaning Bern shahri (22,2 ming dollar) qayd etildi.
Reytingning qolgan pog‘onalarida Jeneva, Seul, Bazel, Tel-Aviv–Yaffo va London kabi shaharlarga o‘rin berilgan. E’tiborlisi, AQSH kabi rivojlangan mamlakatdan faqat Nyu-York TOP-20 ro‘yxatiga kirdi va u 11-o‘rinni egalladi.
Mutaxassislarning fikriga ko‘ra, global talabning ortishi, yer maydonining chegaralanganligi, inflyatsiya va yirik shaharlarning iqtisodiy jozibadorligi sabab narxlar oshishda davom etmoqda. Kelgusi yillarda ayrim shaharlarda narxlarning yanada o‘sishi mumkinligi taxmin qilinmoqda.
