Tobutdan tirik chiqqan ayol hammani hayratga soldi
Tailandda yuz bergan noodatiy voqea mamlakat ommaviy axborot vositalarida katta shov-shuvga sabab bo‘ldi. Bu haqda Zamin.uz xabar berdi.
Nonthaburi provinsiyasidagi ibodatxonada krematsiyaga tayyorlangan 65 yoshli ayol tobut ichidan tirik holda topildi. Hodisa tafsilotlariga ko‘ra, ibodatxona xodimlari tobut ichidan zaif taqillash ovozini eshitib, darhol uni ochgan.
Tobut ichida yotgan ayolning ko‘zlari yarim ochiq bo‘lib, u qopqoqni taqillatgan. Ayolning akasi bergan ma’lumotlarga ko‘ra, u ikki yildan buyon og‘ir xastalikdan aziyat chekib kelgan va bir necha kun oldin nafas olmayotgandek ko‘ringan.
Shu sababli uni donorlik uchun Bangkok shahridagi shifoxonaga olib borishgan, biroq o‘lim guvohnomasining yo‘qligi bois qabul qilishmagan. Shundan so‘ng, ayolning jasadi ibodatxonaga olib kelingan.
Biroq bu yerda ham hujjatlar rasmiylashtirilmagani sababli krematsiya amalga oshirilmagan. Marosim davomida tobut yana taqillab, xodimlar va yig‘ilganlarni hayratga solgan.
Ayol shoshilinch tarzda kasalxonaga yetkazilgan. Shifokorlar uning qondagi qand miqdori keskin tushib ketganini, ya’ni og‘ir gipoglikemiya holatini aniqlashgan.
Aslida uning yurak va nafas olish faoliyati to‘xtamagan ekan. Ibodatxona ma’muriyati ayolning davolanish xarajatlarini o‘z zimmasiga olganini ma’lum qilgan.
Bu voqea hudud ahlini hayratda qoldirgan va keng muhokamalarga sabab bo‘lgan.
