O‘zbekistonning Bangladeshdagi elchisi Sardor Rustamboyev o‘zining ishonch yorlig‘ini Bangladesh prezidenti Muhammad Shahabuddinga topshirdi. Bu haqda Zamin.uz xabar berdi.
Uchrashuv davomida prezident Shahabuddin O‘zbekistonga Markaziy Osiyodagi asosiy hamkor va ishonchli do‘st sifatida qarashini alohida ta’kidladi. Muloqot chog‘ida ikki davlat o‘rtasidagi savdo va investitsiyalar sohasidagi hamkorlikni rivojlantirish masalalari muhokama qilindi.
Xususan, Bangladesh tomonidan tekstil, farmatsevtika va charm sanoatida hamkorlik qilishga tayyorlik bildirildi. Shuningdek, tomonlar turizm va oliy ta’lim sohalaridagi hamkorlikni mustahkamlash borasida kelishuvga erishdilar.
Prezident Shahabuddin O‘zbekistonda amalga oshirilayotgan islohotlarni yuqori baholab, ular mamlakatning xalqaro miqyosdagi mavqeini mustahkamlashga xizmat qilayotganini ta’kidladi. Uchrashuv ochiq va do‘stona ruhda o‘tdi.
