Hindistonda navbatdagi hashamatli to‘y bo‘lib o‘tdi. Bu haqda Zamin.uz xabar berdi.
Bu safar farmatsevtika sohasidagi yirik tadbirkor oilasining qizi Netra Mantena va IT sohasida mashhur tadbirkor Vamsi Garidaju o‘z nikoh marosimlarini nishonlashdi. Ularning to‘yi mamlakatda katta e’tibor qozondi va keng muhokamalarga sabab bo‘ldi.
Marosim Hindistonning go‘zal shaharlaridan biri — Udaypurda o‘tkazildi. Hind an’analariga ko‘ra, to‘y uch kun davom etdi va har kuni o‘ziga xos tarzda o‘zgacha shukuh bilan o‘tdi.
To‘y dastlab The Leela Palace Udaipur mehmonxonasida boshlandi. Bu besh yulduzli majmua o‘z ko‘rkamligi bilan qirol saroyini eslatadi.
Marosim davomida kelin-kuyov 1729-yilda qurilgan Zenana Mahal saroyiga tashrif buyurdi, so‘nggi tadbirlar esa xususiy orolda joylashgan mulkda o‘tkazildi. Tantanalar davomida mashhur xonandalar Jennifer Lopes va Jastin Biber o‘z chiqishlari bilan mehmonlarni hayratda qoldirdi.
Jey Lo hind sarini eslatuvchi pushti libosda sahnaga chiqdi va uning suratlari ijtimoiy tarmoqlarda keng tarqaldi. Bollivud yulduzlari ham tadbirda o‘z iste’dodlarini namoyish etib, qo‘shiq va raqslar ijro qilishdi.
Tanaffuslarda esa “Cirque du Soleil” akrobatlari mehmonlarga ajoyib tomosha taqdim etdi. To‘yda kelin bir necha nafis obrazlarni almashtirdi.
Uning asosiy to‘y libosi oltin kashta bilan bezatilgan qizil sari bo‘lib, bu kiyim ko‘pchilikning e’tiborini tortdi. Kiyim an’anaviy zargarlik buyumlari, bosh bezaklari va yirik taqinchoqlar bilan to‘ldirilgan edi.
Kechki ziyofat uchun Netra pushtirang, brilliantlar bilan bezatilgan ko‘ylakni tanladi. To‘yga nufuzli mehmonlar, jumladan kichik Donald Tramp va uning qallig‘i Bettina Anderson tashrif buyurdi.
Umumiy xarajatlar taxminan 9 million dollarni tashkil etdi. Bu to‘y o‘tgan yili bo‘lib o‘tgan Ambani oilasining mashhur nikoh marosimidan keyingi eng katta tadbir sifatida esda qoldi.
