Yaponiya Markaziy Osiyo bilan ilk sammit o‘tkazadi
Yaponiya hukumati joriy yil dekabr oyining o‘rtalarida Markaziy Osiyo davlatlari ishtirokida ilk sammitni o‘tkazishni rejalashtirmoqda. Bu haqda Zamin.uz xabar berdi.
Bu haqda NHK telekanali xabar berdi. Avvaliga mazkur tadbir 2024 yil yozida Qozog‘istonda o‘tkazilishi ko‘zda tutilgan edi.
Biroq Yaponiyada sodir bo‘lishi mumkin bo‘lgan kuchli zilzila xavfi sababli sammit bekor qilindi. O‘sha davrda Yaponiya bosh vaziri lavozimini Fumio Kisida egallab turgan edi.
Shu yilning yozida Tokioda Markaziy Osiyo va Yevropa o‘rtasidagi savdo yo‘lagini rivojlantirishga tayyorlik bildirilgani e’lon qilingan edi. Bundan tashqari, Yaponiya Markaziy Osiyo hududini uglerodsizlashtirishga qiziqish bildirayotgani va mintaqani qo‘llab-quvvatlash uchun investorlarni jalb qilishni rejalashtirayotgani haqida ham xabarlar tarqaldi.
Hozirgi bosh vazir Sanae Takaichi mazkur sammit mintaqa davlatlari bilan aloqalarni mustahkamlash, iqtisodiy xavfsizlikni ta’minlash va turli sohalarda hamkorlikni rivojlantirish uchun muhim imkoniyat bo‘lishiga umid qilmoqda. 2025 yil noyabr oyining boshlariga kelib, Yaponiya O‘zbekistonning savdo hamkorlari ro‘yxatida 20-o‘rinni egalladi.
Ikki davlat o‘rtasidagi tovar ayirboshlash hajmi 326,8 million dollarni tashkil etdi. Bir yil avval bu ko‘rsatkich 336,3 million dollarni tashkil etgan edi.
