Osiyo mintaqasida bir necha kundan beri davom etayotgan tinimsiz yomg‘ir va kuchli suv toshqinlari og‘ir oqibatlarga olib kelmoqda. Bu haqda Zamin.uz xabar berdi.
“Reuters” xabariga ko‘ra, Tailand, Malayziya va Indoneziyada tabiiy ofatlar tufayli halok bo‘lganlar soni sezilarli darajada oshgan. **Tailand: 55 kishi halok bo‘ldi** Tailandda bir haftadan beri yog‘ayotgan yomg‘ir natijasida yuzaga kelgan sel va toshqinlar 55 kishining hayotiga zomin bo‘ldi.
Eng ko‘p zarar ko‘rgan hududlardan biri Xat Yai shahri bo‘lib, bu yerda suv asta-sekin chekinmoqda. Bu holat aholiga yordam yetkazish va infratuzilmani tiklash ishlarini tezlashtirish imkonini bermoqda.
Hukumat tabiiy ofat hududlarida qolgan aholiga vertolyotlar orqali oziq-ovqat va tibbiy yordam yetkazmoqda. Dronlar yordamida kuzatuv va qutqaruv ishlari olib borilmoqda.
Rasmiylarning ma’lumotiga ko‘ra, janubiy hududlarda taxminan 3 million kishi zarar ko‘rgan. **Malayziya: 34 mingdan ziyod aholi evakuatsiya qilindi** Malayziyada ham tinimsiz yomg‘ir kuchli suv toshqinlariga sabab bo‘ldi.
Yetti shtatda suv toshqinlari qayd etilgan bo‘lib, ikki kishi halok bo‘lgani tasdiqlandi. 34 mingdan ortiq aholi xavfsiz hududlardagi vaqtinchalik markazlarga ko‘chirilgan.
**Indoneziya: Sumatrada kuchli siklon va ko‘chkilar** Indoneziyaning Sumatra orolida tropik siklon va ko‘chkilar jiddiy talofat yetkazdi. Sel va ko‘tarilgan suv oqibatida kamida 100 kishi bedarak yo‘qolgan.
Ushbu hududda qidiruv-qutqaruv ishlari davom etmoqda. Mazkur mintaqada tabiiy ofatlar oqibatida yuzaga kelgan zararlarni bartaraf etish uchun mahalliy hukumatlar va xalqaro tashkilotlar hamkorlikda ish olib bormoqda.
