AQShda o‘zbekistonlik haydovchilarga tekshiruvlar kuchaytirildi
O‘zbekiston Tashqi ishlar vazirligi AQShda yashayotgan fuqarolarga murojaat qilib, mamlakatda migratsiya tekshiruvlari kuchaytirilgani haqida ogohlantirdi. Bu haqda Zamin.uz xabar berdi.
Ushbu tekshiruvlar asosan yuk mashinalari haydovchilariga qaratilib, ularning hujjatlari, ingliz tilini bilish darajasi hamda ishga ruxsatnoma mavjudligi sinchiklab tekshirilmoqda. Nazoratning kuchaytirilishi AQShning noqonuniy migratsiyaga qarshi kurash strategiyasi va terrorizm xavfi bilan bog‘liq choralari doirasida amalga oshirilmoqda.
Avvalroq AQSh hukumati O‘zbekiston fuqarosi Axror Bozorovni hibsga olgan edi. U O‘zbekistonda jihod targ‘iboti bilan bog‘liq gumonlar asosida qidiruvda bo‘lgan.
Bozorov Kansas shtatida qo‘lga olingan bo‘lib, tijoriy haydovchilik guvohnomasi va ishga ruxsatnomaga ega bo‘lgan. Shu munosabat bilan Tashqi ishlar vazirligi AQShda yashayotgan vatandoshlarni barcha hujjatlari va migratsion maqomlarining qonuniyligini tekshirishga chaqirdi.
Shuningdek, shubhali yoki murakkab vaziyatlarda AQShdagi O‘zbekiston elchixonasi va konsulliklariga darhol murojaat qilish zarurligi ta’kidlandi.
