Putin: Ukraina qo‘shinlari chiqsa, janglar to‘xtaydi
Rossiya prezidenti Vladimir Putin Qirg‘izistonga tashrifi yakunida matbuot anjumani o‘tkazdi. Bu haqda Zamin.uz xabar berdi.
U Rossiya–Ukraina mojarosi, AQSH tomonidan taklif qilingan tinchlik konsepsiyasi va boshqa dolzarb masalalar yuzasidan o‘z fikrlarini bildirdi. Quyida asosiy bayonotlar mazmunan keltirilgan.
Putin "tinchlik shartnomasi" bo‘yicha tayyor hujjat mavjud emasligini ta’kidladi. AQSH tomonidan 28 banddan iborat takliflar ro‘yxati taqdim etilgan, ammo bu hujjat kelishuvning yakuniy loyihasi emas.
Prezident bu bandlar muzokaralar uchun asos bo‘lishi mumkinligini aytdi. Rossiya prezidenti janglarni to‘xtatishning asosiy sharti sifatida Ukraina qo‘shinlarining egallab turgan hududlardan chiqishini ko‘rsatdi.
"Agar ular chiqsa, janglar to‘xtaydi. Agar chiqmasa, biz harbiy yo‘l bilan davom ettirishga majbur bo‘lamiz", dedi u.
Hududlarning maqomi va xalqaro-huquqiy tan olish masalasida Putin AQSH bilan muzokaralarning muhimligini ta’kidladi. Unga ko‘ra, Rossiya suvereniteti ostidagi hududlarning tan olinishi muhim masala hisoblanadi.
Putin Rossiyaning Yevropaga nisbatan tajovuzkor rejalari yo‘qligini qat’iy aytib o‘tdi. "Biz bunday da’volarni asossiz va yolg‘on deb bilamiz", dedi u.
U zarurat tug‘ilsa, bu pozitsiyani rasmiy ravishda hujjat shaklida tasdiqlashga tayyorligini bildirdi. G7 guruhiga qaytish masalasida prezident hozircha Rossiyani bu guruhga taklif qilayotgan davlat yo‘qligini aytdi.
U bunday uchrashuvlar amaliy foyda keltirmasligi mumkinligini qayd etdi. Rossiya aktivlarining musodara qilinishi borasida Putin bu harakat Yevropa iqtisodiy tizimi va global moliya bozoriga salbiy ta’sir ko‘rsatishini ta’kidladi.
Rossiya hukumati bunday holatlar uchun maxsus javob choralarini ishlab chiqayotganini ma’lum qildi. Prezident Sergey Lavrovning faoliyatiga oid mish-mishlarni rad etdi va uning o‘z vazifalarini to‘liq bajarayotganini aytdi.
Shuningdek, AQSH vakili bilan muzokaralar odatdagidek, bosimsiz o‘tayotganini ta’kidladi. Ukraina rahbariyati haqida so‘zlar ekan, Putin Ukraina prezidentini saylovlardan qochishda aybladi va Rossiya og‘ir harbiy sharoitga qaramay, saylovlarni muvaffaqiyatli o‘tkazganini misol keltirdi.
"Lukoyl" va "Rosneft" kompaniyalariga qarshi sanksiyalarni esa u tushunarsiz deb atadi. Jenevada hech qanday ziddiyat kuzatilmaganini aytgan Putin, sanksiyalar qo‘llanilganiga hayronligini bildirdi.
Jang maydonidagi vaziyatga to‘xtalar ekan, Putin Rossiya qo‘shinlari barcha yo‘nalishlarda ilgarilashni davom ettirayotganini, qaytarib olingan hududlar soni o‘sib borayotganini va harbiy operatsiyalar sur’ati tezlashayotganini ma’lum qildi.
