Rossiyada migrantlar uchun viza rejimi taklif qilindi

Rossiyadagi "Adolatli Rossiya — Haqiqat uchun" partiyasi rahbari Sergey Mironov mamlakatda migratsiya masalalari jiddiy muammoga aylanganini ta’kidlab, bu borada qat’iy choralar ko‘rish zarurligini ilgari surdi. Bu haqda Zamin.uz xabar berdi.

Siyosatchi "Rossiya 24" telekanali orqali chiqishida migrantlarga nisbatan uchta asosiy taklifni bildirdi. Ushbu takliflar orasida Markaziy Osiyo davlatlari bilan viza rejimini joriy etish masalasi ham bor.

Mironovning fikricha, Rossiyaning ayrim hududlarida mahalliy aholi o‘z yashash joylarini tark etishga majbur bo‘lmoqda. U bu holatni "kelgindilarning hududni egallashi va o‘z urf-odatlariga ko‘ra yashashi" bilan izohladi.

Siyosatchi migrantlarning Rossiya qonunlariga amal qilmayotganini tanqid qilib, vaziyatni o‘ta jiddiy deb baholadi va qat’iy choralar ko‘rishni talab qildi. Mironovning birinchi taklifi migrantlar uchun patent tizimidan voz kechib, rotatsiya usuliga o‘tishdir.

Ya’ni, ishchilar shaharlarda emas, balki qurilish maydonlarida yashash joylari bilan ta’minlanishi kerak. Bu tamoyil "keldi – ishladi – ketdi" tartibiga asoslanadi.

Ikkinchi taklif esa migrant jinoyat sodir etsa, nafaqat u, balki uning oila a’zolari va qarindoshlari ham mamlakatdan chiqarib yuborilishi kerakligini nazarda tutadi. Bu jamoaviy jazolash mexanizmini joriy etish deganidir.

Uchinchi taklif Markaziy Osiyo davlatlari bilan viza rejimini joriy qilishdir. Mironov bu rejimni joriy etish masalasi muqarrar ekanini ta’kidladi.

Siyosatchi ilgari ham migratsiya oqimining ijtimoiy sohaga ortiqcha yuk bo‘layotgani haqida gapirgan. Uning fikricha, migrantlarning ko‘pchiligi ish uchun emas, balki shaxsiy va oilaviy sabablarga ko‘ra Rossiyaga kelmoqda.

Shu sababli, bu masala yanada jiddiy e’tibor talab qiladi.