Rossiyada WhatsApp faoliyati cheklanishi mumkin
Rossiyada WhatsApp messenjeri faoliyati atrofida jiddiy vaziyat yuzaga kelmoqda. Bu haqda Zamin.uz xabar berdi.
Agar platforma mahalliy qonunlarga to‘liq amal qilmasa, mamlakat hududida ishlashdan to‘xtashi mumkin. Bu haqda Rossiyaning aloqa va axborot texnologiyalari sohasida nazoratni amalga oshiruvchi federal xizmat – Roskomnadzor rasmiy ma’lumot berdi.
Roskomnadzorning ta’kidlashicha, messenjerga nisbatan cheklov choralari bosqichma-bosqich joriy etilmoqda. Sabab sifatida WhatsApp Rossiyada jinoyatlarning oldini olishga qaratilgan qonun talablarini bajarmayotgani ko‘rsatilgan.
Xususan, platforma terrorchilik faoliyatlarini tashkil qilish, jinoyatchilarni yollash va boshqa noqonuniy harakatlarda foydalanilayotgani qayd etilgan. Shu sababli Roskomnadzor messenjer faoliyatini nazoratga olib, cheklovlarni kuchaytirishga majbur bo‘lgan.
Ma’lumotlarga ko‘ra, cheklovlar bosqichma-bosqich amalga oshirilmoqda, bu esa foydalanuvchilarga boshqa ilovalarga o‘tish imkonini bermoqda. Agar WhatsApp Rossiya qonunlariga rioya qilishdan bosh tortsa, u to‘liq bloklanishi mumkin.
Avgust oyidan beri messenjerning qo‘ng‘iroqlar sifati yomonlashgani kuzatilgan. Oktyabr oyida esa Roskomnadzor WhatsApp faoliyatini qisman cheklashga kirishgan va bu qarorni jinoyatchilikka qarshi kurash zarurati bilan izohlagan.
28-noyabr kuni Moskva shahrida va boshqa hududlarda messenjer faoliyatida uzilishlar, xabar yuborishda kechikishlar va media fayllarni jo‘natishda qiyinchiliklar kuzatilgan. Hozirda WhatsApp Rossiyada eng ommabop messenjerlardan biri bo‘lib, Google Play ma’lumotlariga ko‘ra, “Aloqa” toifasidagi ilovalar orasida beshinchi o‘rinda turadi.
Mediascope tahlillariga ko‘ra, 2025-yil oktyabr oyida Rossiyada messenjerning auditoriyasi 96,2 million foydalanuvchini tashkil etgan, Telegram esa 91 million foydalanuvchiga ega bo‘lgan. WhatsApp’ning to‘liq bloklanishi haqidagi muhokamalar 2024-yildan buyon davom etmoqda.
Davlat Dumasi qo‘mitasi rahbari Sergey Boyarskiy o‘tgan yil dekabr oyida bu masalani mish-mish deb atagan va ehtiyotkorlik bilan yondashishni tavsiya qilgan edi.
