Rossiyada WhatsApp’dan foydalanish bosqichma-bosqich cheklanmoqda
Rossiya Aloqa va axborot texnologiyalarini nazorat qilish organi (Roskomnadzor) mamlakat hududida WhatsApp messenjeridan foydalanishni bosqichma-bosqich cheklashni boshlaganini ma’lum qildi. Bu haqda Zamin.uz xabar berdi.
Tashkilot bergan ma’lumotlarga ko‘ra, ushbu messenjer terrorchilik hujumlarini muvofiqlashtirish, jinoyatchilarni yollash, firibgarlik va rossiyalik fuqarolarga qarshi boshqa noqonuniy harakatlarda qo‘llanilmoqda. Roskomnadzor ta’kidlashicha, cheklovlar bosqichma-bosqich joriy etilib, foydalanuvchilar uchun muqobil xizmatlarga o‘tish imkoniyati yaratiladi.
Agar WhatsApp Rossiya qonunchiligida belgilangan talablarni bajarmasa, uning faoliyati butunlay to‘xtatilishi mumkin. WhatsApp’dan foydalanishda yuzaga kelgan muammolar haqida shikoyatlar noyabr oyining oxirlarida paydo bo‘lgan edi.
Shu yilning yozida Roskomnadzor WhatsApp va Telegram’da ovozli qo‘ng‘iroqlarni cheklash choralarini ham amalga oshirgan edi. Tashkilotning ma’lumotiga ko‘ra, jinoyatchilar ushbu platformalar orqali firibgarlik qo‘ng‘iroqlarini amalga oshirish va noqonuniy yollash harakatlarini kuchaytirgan.
Shuningdek, Rossiya Raqamli rivojlanish vazirligi xorijiy messenjerlarda ovozli qo‘ng‘iroqlarni cheklash orqali firibgarlik holatlarini kamaytirish va aloqa xavfsizligini oshirishga erishish mumkinligini bildirgan. Biroq cheklovlarga qaramasdan, WhatsApp Rossiyada eng ommabop messenjer bo‘lib qolmoqda.
2025 yil avgust oyi holatiga ko‘ra, uning oylik foydalanuvchilari soni 97 millionga, kunlik foydalanuvchilari esa 82,1 millionga yetgan.
