Zelenskiy tinchlik muzokaralari rahbarini almashtirdi
Ukraina prezidenti Vladimir Zelenskiy Milliy xavfsizlik kengashi kotibi Rustam Umerovni tinchlik muzokaralari bo‘yicha Ukraina delegatsiyasi rahbari etib tayinladi. Bu haqda Zamin.uz xabar berdi.
Ushbu delegatsiya AQSh, Ukraina xalqaro hamkorlari hamda Rossiya vakillari bilan muzokaralar olib borishi rejalashtirilgan. Rasmiy ma’lumotlarga ko‘ra, muzokaralarning asosiy maqsadi adolatli va barqaror tinchlikka erishishdir.
Yangilangan delegatsiya tarkibiga mamlakatning asosiy davlat idoralari vakillari kiritilgan. Bungacha muzokaralar guruhiga prezident ofisi rahbari Andrey Yermak boshchilik qilgan edi.
Zelenskiy tomonidan chiqarilgan maxsus farmonga binoan uning vakolatlari bekor qilindi. Ma’lum qilinishicha, Yermak o‘z ixtiyori bilan jangovar qo‘shin safiga qo‘shilish qarorini qabul qilgan.
Rustam Umerovning vakolatlari kengaytirilgani ta’kidlanmoqda. So‘nggi oylarda u xalqaro aloqalarda Ukraina rahbariyatining asosiy vakillaridan biriga aylangan.
Qayd etilishicha, Rustam Umerov Samarqand viloyatining Bulung‘ur shahrida tug‘ilgan.
