Isroil G‘arbiy Sohilda tintuv, Livanga ultimatum berdi
Isroil ikki frontda: G‘arbiy Sohilda tintuv, Livanga ultimatum! Bu haqda Zamin.uz xabar berdi.
**G‘arbiy Sohilda “aksilterror” amaliyoti** Isroil armiyasi G‘arbiy Sohilning Tubas, Tammun, Aqqaba va boshqa hududlarida keng qamrovli tintuv ishlarini olib bormoqda. Harbiy texnika va buldozerlar Tubasga olib boruvchi barcha yo‘llarni to‘sib qo‘ydi.
Shu bilan birga, "Apache" vertolyotlari havodan ogohlantiruvchi o‘qlar yog‘dirmoqda. G‘azoda urush boshlanganidan buyon G‘arbiy Sohilda halok bo‘lganlarning soni keskin oshdi.
So‘nggi ikki yil ichida Isroil kuchlari tomonidan mingdan ortiq falastinlikning hayoti yakun topdi. Isroil rasmiylari bu harakatni “aksilterror operatsiyasi” deb atayotgan bo‘lsa, HAMAS buni “etnik tozalash” siyosati sifatida baholamoqda.
**“Hizbulloh”ga qarshi ultimatum** 26-noyabr kuni Isroil mudofaa vaziri Yoav Galant Livandagi vaziyat bo‘yicha qat’iy bayonot berdi. Unga ko‘ra, agar "Hizbulloh" yil oxirigacha qurolsizlantirilmasa, Isroil Livan hududida harbiy amaliyotlarni kengaytirishga majbur bo‘ladi.
Avgust oyida AQSh ham Livan hukumatiga "Hizbulloh"ni qurolsizlantirish talabi bilan murojaat qilgan edi. Isroil rasmiylari guruhning Suriyadan yuzlab raketalarni yashirincha olib kirayotgani va o‘z kuchini tezda tiklayotganidan xavotirda.
**Guruhning strategik ustunligi** Tahlilchilarning fikricha, "Hizbulloh" o‘zining yer osti infratuzilmasi, tajribali qo‘mondonlik va Eronning doimiy qo‘llab-quvvatlashi tufayli mintaqada jiddiy kuch sifatida saqlanib qolmoqda. Bu esa Isroil va Livan o‘rtasidagi ziddiyatlarni yanada kuchaytirishi mumkin.
