Hindistonning Mumbay shahrida besh yoshli qiz qarindoshlari tomonidan pul evaziga sotib yuborilgani ma’lum bo‘ldi. Bu haqda Zamin.uz xabar berdi.
Politsiya tezkor chora ko‘rib, qizni topdi va uni onasiga qaytarib berdi. Tergov ma’lumotlariga ko‘ra, bolaning amakisi va xolasi uni begona shaxslarga sotgan.
Xaridorlar esa qizni yana qimmatroq narxda boshqa odamlarga sotishga uringan. Vaziyat haqida xabar tarqalgach, politsiya darhol surishtiruv ishlarini boshladi.
O‘tkazilgan maxsus operatsiyalar davomida odam savdosi bilan shug‘ullangan besh nafar shaxs qo‘lga olindi. Qiz tegishli organlar nazorati ostida xavfsiz tarzda onasiga topshirildi.
Hozirda ushbu ish yuzasidan surishtiruv ishlari davom etmoqda. Politsiya voqeaga aloqador boshqa shaxslarni aniqlash va mas’uliyatga tortish uchun izlanishlarni davom ettirmoqda.
Mazkur holat Hindistonda bolalar huquqlari himoyasi masalasiga jiddiy e’tibor qaratish zarurligini yana bir bor ko‘rsatdi.
