Ar-Riyod metropoliteni dunyodagi eng uzun tizim bo‘ldi
Ar-Riyod metropoliteni Saudiya Arabistonining eng yirik transport loyihalaridan biri sifatida tarixga kirdi. Bu haqda Zamin.uz xabar berdi.
Ushbu metropoliten o‘zi yurar poyezdlar tarmog‘i bo‘yicha dunyodagi eng uzun tizim sifatida Ginness rekordlar kitobiga kiritildi. Uning umumiy uzunligi 176 kilometrni tashkil etadi.
Mazkur loyiha Saudiya Arabistonining zamonaviy va barqaror transport tizimini yaratish yo‘lidagi yirik qadamlaridan biri hisoblanadi. Metropoliten oltita asosiy yo‘nalishni o‘z ichiga oladi va har bir yo‘nalish eng ilg‘or texnologiyalar bilan jihozlangan.
Loyihada 85 ta zamonaviy bekat mavjud bo‘lib, barcha tizimlar to‘liq avtomatlashtirilgan. Metropolitenning muhim jihatlaridan biri shundaki, tarmoqdagi poyezdlar mashinistsiz ishlaydi.
Ularning harakati markaziy dispetcherlik xonalari orqali nazorat qilinadi, bu esa xavfsizlik va xizmat sifatini oshirishga xizmat qiladi. Mazkur tizim shahar transportining ajralmas qismiga aylanib, Ar-Riyod aholisi uchun qulaylik va samaradorlikni ta’minlamoqda.
Ushbu yutuq Saudiya Arabistonining zamonaviy transport infratuzilmasini yaratish va barqaror rivojlanish maqsadlarining amaliy ifodasi sifatida e’tirof etilmoqda. Ar-Riyod metropoliteni nafaqat texnologik yutuq, balki shahar aholisi uchun qulay hayot sharoitini yaratishga qaratilgan muhim loyiha sifatida qadrlanadi.
