Turkmaniston Markaziy banki 1-dekabrdan boshlab 200 manatlik yangi banknotani muomalaga chiqardi. Bu haqda Zamin.uz xabar berdi.
Ushbu kupyura mamlakatning doimiy betaraflik maqomining 30 yilligiga bag‘ishlangan. Yangi pul belgisi polimer materialdan tayyorlangan bo‘lib, nafaqat 200 manatlik, balki 1, 5 va 10 manatlik kupyuralar ham qayta ishlanib, polimer asosida chiqarildi.
Ularning avvalgi rangi va ko‘rinishi saqlab qolingan, biroq 2025 yilni Xalqaro tinchlik va ishonch yili deb belgilagan maxsus emblema qo‘shilgan. 200 manatlik pulning old tomonida Arqadag‘ haykali, orqa tomonida esa Arqadag‘ shahri hokimligining ma’muriy binosi aks ettirilgan.
Polimer kupyuralar qog‘oz pullarga qaraganda bir qator ustunliklarga ega. Ular soxtalashtirishga qarshi kuchli himoyaga ega bo‘lib, tashqi ta’sirlarga chidamli: ifloslanish, namlik va yeyilishga bardoshli.
Shuningdek, polimer pullar qog‘oz pullarga nisbatan uzoqroq muddat xizmat qiladi, oson yirtilmaydi va bakteriyalarni kamroq to‘playdi. Eskirgan polimer pullarni qayta ishlash imkoniyati esa ularni atrof-muhitga zararini kamaytiradi.
Turkmaniston Markaziy Osiyoda polimer pulni muomalaga kiritgan birinchi davlat bo‘ldi. Ta’kidlash joizki, dunyoda birinchi polimer banknotlar 1988 yilda Avstraliyada joriy etilgan va bu mamlakat keyinchalik qog‘oz valyutadan butunlay voz kechgan.
Shu bilan birga, mamlakatda manatning rasmiy kursi 1 dollar uchun 3,5 manatni tashkil etsa-da, norasmiy bozorda bu qiymat 19-20 manatgacha yetadi. Markaziy bank avvalgi qog‘oz pullar ham qonuniy to‘lov vositasi sifatida muomalada qolishini ma’lum qilgan.
