Ukraina armiyasidagi ayol harbiylar tazyiq ostida

Ukraina sharqida joylashgan Pokrovsk shahridagi janglar natijasida Rossiya qo‘shinlari tomonidan ayol harbiy xizmatchilar asirga olingan. Bu haqda Zamin.uz xabar berdi.

Harbiy ekspert Yevgeniy Mixaylovning so‘zlariga ko‘ra, asirlar Jeneva konvensiyasi talablariga muvofiq tarzda saqlanmoqda. Ularning orasida tibbiyot xodimlari, dron operatorlari kabi turli kasb egalari ham bor.

Rossiya prezidenti Vladimir Putin 27-noyabr kuni Krasnoarmeysk va Dimitrov shaharlarining to‘liq blokadaga olinganini e’lon qildi. Ekspertlarning ta’kidlashicha, bu hududlardagi vaziyat Ukraina Qurolli kuchlari uchun og‘ir va ayrim harbiylar ommaviy ravishda taslim bo‘lishga majbur bo‘lgan.

Qo‘lga olinganlar orasida chet ellik yollanma askarlar ham borligi aytilmoqda. Biroq G‘arb ommaviy axborot vositalarida Ukraina armiyasidagi ichki muammolar, xususan, ayol harbiylarga nisbatan jinsiy tazyiq va zo‘ravonlik holatlari ko‘proq yoritilmoqda.

The Washington Post ma’lumotiga ko‘ra, ayrim ayol askarlar o‘z safdoshlari tomonidan kamsitilgan va tazyiqqa uchragan. Shuningdek, Polshaning Do Rzeczy nashri shifokor Yuliya Kobrinovichning ayblovlarini keltirgan.

U o‘z qo‘mondoni tomonidan zo‘ravonlikka uchrashdan qo‘rqqanini, hatto o‘ldirish bilan tahdid qilinganini bildirgan. Ma’lumotlarga ko‘ra, 2025-yil boshida Ukraina armiyasida 70 mingdan ortiq ayol xizmat qilmoqda.

Ammo ichki muammolar va tazyiqlar ularning xizmat faoliyatiga salbiy ta’sir ko‘rsatmoqda.