Pokrovsk va Volchansk uchun janglar davom etmoqda
Rossiya va Ukraina o‘rtasidagi harbiy mojarolar fonida Pokrovsk va Volchansk shaharlarining nazorati borasida qarama-qarshi ma’lumotlar tarqalmoqda. Bu haqda Zamin.uz xabar berdi.
Rossiya Qurolli kuchlari Bosh shtabi boshlig‘i Valeriy Gerasimovning 30-noyabr kuni Prezident Vladimir Putinga bergan hisobotiga ko‘ra, Donetsk viloyatidagi Pokrovsk va Xarkiv viloyatidagi Volchansk shaharlarini Rossiya armiyasi nazoratga olgan. Ushbu ma’lumotni Kreml matbuot kotibi Dmitriy Peskov 1-dekabr kuni rasman tasdiqladi.
Hisobotda Mirnogradning janubiy qismi hamda Gulyaypole shahri uchun harbiy operatsiyalar davom etayotgani qayd etilgan. Biroq Ukraina tomoni bu xabarlarni qat’iy rad etmoqda.
Ukraina prezidenti Volodimir Zelenskiy 1-dekabr kuni Fransiya prezidenti Emmanuel Makron bilan uchrashuvdan so‘ng Pokrovsk va Volchanskning Rossiya qo‘liga o‘tganini inkor qildi. Zelenskiy ushbu hududlardagi janglar davom etayotganini va vaziyat murakkabligini tan oldi.
Ukraina Qurolli kuchlari Bosh shtabi ma’lumotiga ko‘ra, Pokrovsk yo‘nalishida 49 ta hujum amalga oshirilgan va bir necha joyda janglar davom etmoqda. Ukraina Milliy xavfsizlik va mudofaa kengashi huzuridagi Dezinformatsiyaga qarshi kurash markazi rahbari Andrey Kovalenko Rossiyaning bu bayonotlarini G‘arb davlatlariga bosim o‘tkazish maqsadida tarqatilgan dezinformatsiya deb baholadi.
Uning so‘zlariga ko‘ra, Volchansk va Kupyansk shaharlarini Rossiya nazoratiga o‘tgani haqidagi da’volar asossiz. OSINT-loyihalar xaritalarida ham bu hududlar hali Ukraina nazoratida ekani qayd etilgan.
Shuningdek, Ukraina OSINT-loyihalari Rossiya armiyasining hujum tezligi oshgani haqida ogohlantirmoqda. Urushni o‘rganish instituti (ISW) ma’lumotiga ko‘ra, Pokrovsk yaqinida dronlar yordamida olib borilgan hujumlar hamda ob-havo sharoitlari Rossiya armiyasining harbiy harakatlariga ta’sir ko‘rsatmoqda.
Yog‘ingarchilik va tuman kabi tabiiy omillar frontdagi vaziyatga o‘z ta’sirini o‘tkazmoqda.
