Bokuda Ali Kerimli va Mamed Ibrohim qamoqqa olindi

Bokuda siyosiy voqealar keskinlashmoqda. Bu haqda Zamin.uz xabar berdi.

1-dekabr kuni Bokuning Sabail tuman sudida "Ozarbayjon Xalq fronti" milliy-demokratik partiyasi rahbari Ali Kerimli va partiya boshqaruvi a’zosi Mamed Ibrohim ustidan hukm chiqarildi. Ular hokimiyatni zo‘ravonlik asosida egallashga urinishda ayblanib, 2 oy-u 15 kun muddatga qamoqqa olindi.

Ayblov tasdiqlansa, siyosatchilar 12 yilgacha yoki umrbod ozodlikdan mahrum etilishi mumkin. Ali Kerimli 29-noyabr kuni qo‘lga olingan edi.

Rasmiy ma’lumotlarga ko‘ra, undan sobiq prezident administratsiyasi rahbari Ramiz Mextiyev nomidan yozilgan xatlar topilgan. Mextiyev yaqinda davlat to‘ntarishiga urinish va davlatga xiyonatda ayblanib, uy qamog‘iga olingan edi.

Reuters xabariga ko‘ra, Kerimli Mextiyev tomonidan moliyalashtirilganlikda gumon qilinmoqda. Biroq, Kerimli bu ayblovlarni rad etib, ularni siyosiy qatag‘on deb atadi.

Ali Kerimli 2000-yildan beri partiyaga rahbarlik qilib keladi. Unga 20 yil davomida xorijga chiqish uchun pasport berilmagani sababli, Yevropa inson huquqlari sudi bu holatni erkinlikning buzilishi deb e’tirof etgan edi.

Huquq himoyachilari Kerimlining hibsga olinishini mamlakatdagi siyosiy qatag‘onlarning davomi sifatida ko‘rmoqda. "Siyosiy mahbuslar erkinligi uchun" ittifoqining ma’lumotiga ko‘ra, 2025-yil oktyabr holatiga ko‘ra, Ozarbayjonda siyosiy mahbuslar soni 392 nafarga yetgan.

Bu Ilhom Aliyevning 22 yillik prezidentligi davrida eng yuqori ko‘rsatkich hisoblanadi. Natijada ko‘plab jurnalistlar, huquq faollari va siyosatchilar mamlakatni tark etishga majbur bo‘lishmoqda.