AQSh prezidenti Donald Tramp 21-noyabr kuni Venesuela prezidenti Nikolas Maduro bilan telefon orqali muloqot qilib, unga mamlakatni tark etishi uchun bir hafta vaqt bergani aytilmoqda. Bu haqda Zamin.uz xabar berdi.
Reuters agentligining xabariga ko‘ra, Tramp Maduroga istalgan davlatga oila a’zolari bilan birga ko‘chib o‘tishi mumkinligini bildirgan. Ushbu muddat 28-noyabr, juma kuni yakunlangan.
Muddat tugaganidan so‘ng, Tramp ijtimoiy tarmoqlarda Venesuela havo hududi AQSh uchun yopilganini rasman e’lon qilgan. Reuters manbalariga ko‘ra, Maduro mamlakatni tark etishga rozi bo‘lgan, biroq bir nechta shartlarni ilgari surgan.
U AQShdan o‘zi va oilasi uchun to‘liq huquqiy kafolatlar, sanksiyalarning bekor qilinishi hamda xalqaro jinoyat sudidagi ishni to‘xtatishni talab qilgan. Biroq Tramp ma’muriyati bu shartlarga rozi bo‘lmagan va ularni rad etgan.
So‘nggi yillarda AQSh va Venesuela o‘rtasidagi munosabatlar keskinlashgan. AQSh hukumati Maduroni qonuniy prezident sifatida tan olmaydi va uning hukumatini korrupsiya, qonunchilikni buzish hamda narkotrafikka qarshi kurashdagi sustkashlikda ayblaydi.
Sentyabr oyidan boshlab, AQSh Karib dengizi hududida harbiy kemalar va samolyotlarni joylashtirib, narkotik tashishda gumon qilingan kemalarga bir necha bor zarbalar bergan. Ushbu harakatlar oqibatida 80 dan ortiq odam halok bo‘lgani ma’lum qilingan.
So‘nggi choralar, jumladan, Venesuela havo hududini yopish, Vashingtonning Karakasga nisbatan bosimini yanada kuchaytirdi. Tahlilchilarning fikricha, bu qadam Venesueladagi siyosiy inqirozni yanada chuqurlashtirishi mumkin.
