Rossiya prezidenti Vladimir Putin "Rossiya chaqiradi!" investitsiya forumida so‘zga chiqib, Yevropa bilan urush qilish niyatida emasligini, ammo zarur bo‘lsa, Moskva bunga tayyor ekanligini ta’kidladi. Bu haqda Zamin.uz xabar berdi.
Uning so‘zlariga ko‘ra, Yevropa Qo‘shma Shtatlar ma’muriyatining Ukrainadagi mojaroni tinch yo‘l bilan hal qilishga xalaqit bermoqda. Rossiya strategik mag‘lubiyatga uchrash haqidagi g‘oyalarni rad etadi va Bryusselning nomaqbul takliflarini qabul qilmaydi.
Putin Ukrainadagi harbiy harakatlarni "maxsus operatsiya" sifatida baholab, bu urush emasligini aytdi. Unga ko‘ra, Rossiya bu jarayonda ehtiyotkorlik bilan va aniq maqsadlar yo‘lida harakat qilmoqda.
Qora dengizdagi vaziyatga to‘xtalar ekan, Putin Ukraina tomonidan tankerlarga hujumlar davom etsa, Rossiya javob choralarini ko‘rishi mumkinligini bildirdi. U bunday harakatlarni "dengiz qaroqchiligi" deb atadi va eng radikal javob sifatida Ukrainani Qora dengizdan butunlay uzib qo‘yish ehtimolini tilga oldi.
Shu orqali Rossiya o‘z manfaatlarini himoya qilishga tayyorligini yana bir bor namoyon qildi.
