Jorj Formanning Olimpiada medali auksionda sotuvda
Afsonaviy amerikalik bokschi Jorj Formanning 1968-yilgi Mexiko Olimpiadasida qo‘lga kiritgan oltin medali “Lelands” auksion uyida sotuvga qo‘yildi. Bu haqda Zamin.uz xabar berdi.
Bu haqda auksion tashkiloti o‘zining rasmiy sahifasida xabar berdi. Ushbu medalning auksionga qo‘yilishi sport ixlosmandlari va kolleksionerlar orasida katta qiziqish uyg‘otdi.
Medal Formanning yoshlik davridagi boksdagi ilk yutug‘i sifatida tarixiy ahamiyatga ega. 1968-yilda, 19 yoshida, Jorj Forman +81 kg vazn toifasida sovet bokschisi Yonas Chepulisni texnik nokaut bilan mag‘lub etib, birinchi Olimpiada oltin medalini qo‘lga kiritgan edi.
Auksionda medalning boshlang‘ich narxi 2 500 dollar etib belgilandi, hozirda esa uning narxi 6 486 dollardan oshgan. Sport yodgorliklari savdosi bilan mashhur bo‘lgan “Lelands” auksion uyi 1985-yildan beri faoliyat yuritib kelmoqda va sport tarixiga oid qimmatli yodgorliklarni savdoga chiqarish borasida katta tajribaga ega.
Jorj Forman nafaqat Olimpiada chempioni, balki og‘ir vazn toifasida WBC, WBA va IBF kamarlarini qo‘lga kiritgan sobiq chempion sifatida ham mashhur. U professional ringda 81 ta jang o‘tkazib, 76 tasida g‘alaba qozongan.
Ushbu g‘alabalarning 68 tasi nokaut bilan yakunlangan. Forman 1969-yilda professional boksga o‘tib, 1977-yilda faoliyatini yakunlagan.
Ammo 1987-yilda u yana ringga qaytib, 1997-yilda, 48 yoshida, sport faoliyatini yakunlagan. Bugungi kunda uning yutuqlari nafaqat sport, balki tarixiy meros sifatida ham qadrlanadi.
