Xitoyda sobiq amaldor 15 yilga qamaldi

Xitoyning Xubey provinsiyasida sud Kommunistik partiya Markaziy qo‘mitasining Intizomiy nazorat va korrupsiyaga qarshi kurash bo‘limining sobiq rahbari Li Gangni 15 yilga ozodlikdan mahrum etdi. Bu haqda Zamin.uz xabar berdi.

U 102 million yuan (taxminan 14,4 million dollar) miqdorida pora olganlikda aybdor deb topildi. Shuningdek, sud Li Gangga 6 million yuan (850 ming dollar) jarima belgiladi va noqonuniy yo‘l bilan topilgan daromadlarini musodara qildi.

Sud jarayonida ma’lum bo‘lishicha, Li Gang 1998 yildan 2024 yilgacha o‘z lavozimidan suiiste’mol qilib, turli biznes shartnomalari, yer sotib olish, lavozimga ko‘tarilish va boshqa imtiyozlar evaziga pora olgan. U bu jinoyatlarni Sichuan provinsiyasi gubernatori o‘rinbosari va Yunnan provinsiyasi hukumatining tashkilot bo‘limi boshlig‘i lavozimlarida ishlagan vaqtida sodir etgan.

Li Gang 2024 yilning aprel oyida hibsga olingan. Tergov davomida u boshqa korrupsiya holatlariga oid ma’lumotlarni ochib bergan va o‘z xatolarini tan olgan.

Shu sababli, sud uning jazosini yengillashtirdi. Xitoyda korrupsiyaga qarshi kurash choralari juda qat’iy.

Ko‘plab amaldorlar og‘ir jinoyatlar uchun hatto o‘lim jazosiga mahkum qilinadi. Li Gangning tergov bilan hamkorlik qilgani, noqonuniy yo‘l bilan topilgan mablag‘larning katta qismini qaytarishi va pushaymonligi uning jazosi yengillashtirilishiga sabab bo‘ldi.

Xitoy hukumati korrupsiya bilan kurashish siyosatini yanada kuchaytirib, qonun ustuvorligini ta’minlashga intilmoqda.