Putin va AQSh vakillari tinchlik rejasini muhokama qildi
Rossiya Prezidenti Vladimir Putin Moskvada AQSh maxsus vakili Stiv Uitkoff va Donald Trampning siyosiy maslahatchisi Jared Kushner bilan o‘tkazilgan muzokaralar haqida batafsil ma’lumot berdi. Bu haqda Zamin.uz xabar berdi.
Uchrashuv davomida tomonlar Tramp tomonidan taklif qilingan tinchlik rejasini har bir bandi bo‘yicha alohida muhokama qilishgan. Putinning so‘zlariga ko‘ra, ushbu muzokaralar ancha uzoq davom etgan.
AQSh delegatsiyasi Moskvaga 27 banddan iborat tinchlik rejasini olib kelgan. Ushbu reja to‘rt qismga bo‘lingan bo‘lib, har bir qismi bosqichma-bosqich ko‘rib chiqilishi taklif etilgan.
Rossiya ushbu yondashuvni "tushunarli va amaliy" deb baholagan bo‘lsa-da, hali aniq kelishuvga erishilmagan. Reja, asosan, Tramp va AQSh rasmiylari o‘rtasida Alyaskada erishilgan kelishuvlarga asoslangan.
Putinning ta’kidlashicha, Rossiya Ukrainadagi urushni to‘xtatish uchun bir necha takliflar kiritgan. Xususan, Kiyevga Donbass hududidan qo‘shinlarni olib chiqish va hujumga o‘tmaslik bo‘yicha ogohlantirishlar berilgan.
Ammo Ukraina harbiy yo‘lni tanlashda davom etgan. Rossiya esa Donbass va Novorossiyani har qanday yo‘l bilan, jumladan harbiy chora-tadbirlar orqali ham ozod qilish qarorida qat’iy ekanini ma’lum qilgan.
Muzokaralar davomida tomonlar o‘rtasida "foydali va mazmunli" muloqot bo‘lib o‘tgan bo‘lsa-da, hali urushni to‘xtatish bo‘yicha yakuniy qarorga kelinmagan. Rossiya o‘z harbiy maqsadlaridan voz kechmoqchi emasligini bildirgan.
Tramp orqali AQShning vositachilik sa’y-harakatlari ham hozircha natija bermagan. Rossiya uchun asosiy maqsad – o‘z shartlariga ko‘ra Ukrainadagi qo‘shinlarni qaytarish hamda Donbass va Novorossiyani to‘liq nazorat ostiga olishdir.
