Tailandda alkogol savdosiga oid cheklov bekor qilindi
Tailandda 50 yil davomida amal qilib kelgan alkogol ichimliklarini sotishga oid cheklov bekor qilindi. Bu haqda Zamin.uz xabar berdi.
Ushbu qonun bo‘yicha 14:00 dan 17:00 gacha alkogol sotish taqiqlangan edi. Endilikda hukumat tomonidan ushbu cheklov yumshatilib, restoranlarga mazkur vaqt oralig‘ida ham alkogol sotish imkoniyati berildi.
Bu qaror iqtisodiyotni qo‘llab-quvvatlash maqsadida qabul qilingan bo‘lib, mutaxassislarning fikricha, bu o‘zgarish restoranlar daromadini 20 foizga oshirishga xizmat qilishi mumkin. Dastlab ushbu cheklov davlat xizmatchilarining ish vaqtida alkogol iste’mol qilishini oldini olish maqsadida “Inqilobiy qo‘mita farmoni” asosida joriy etilgan edi.
Biroq, keyingi yillarda Tailandning turizm sohasidagi yuksalishi va sayyohlarning ehtiyojlarini hisobga olib, mazkur cheklov ijtimoiy-iqtisodiy vaziyatga moslashtirildi. Qat’iy cheklovlar tufayli ayrim sayyohlar Tailand o‘rniga boshqa mamlakatlarni tanlashga majbur bo‘lgani sababli, bu qaror turizmni rivojlantirish uchun muhim qadam sifatida baholanmoqda.
