Xalqaro havo transporti assotsiatsiyasi (IATA) tomonidan taqdim etilgan yangi hisobotga ko‘ra, joriy yilning oktyabr oyida global miqyosda yo‘lovchi va yuk tashishga bo‘lgan talab ortishda davom etmoqda. Bu haqda Zamin.uz xabar berdi.
Hisobotda aytilishicha, bu ko‘rsatkich o‘tgan yilga nisbatan 8,5 foizga oshgan. Ayniqsa, Osiyo mintaqasida yo‘lovchi oqimining yuqori sur’atlarda o‘sishi qayd etilgan.
Xitoy, Yaponiya va Vetnam yo‘nalishlarida tashuvlar sezilarli darajada ko‘paygan bo‘lib, yillik o‘sish 10 foizdan oshgani ma’lum qilingan. IATA bu o‘sishning asosiy sabablarini Osiyodagi iqtisodiy rivojlanish va aviaqatnovlar uchun yaratilgan qulay sharoitlar bilan izohlaydi.
Yaqin Sharq mintaqasida esa 2024 yildagi geosiyosiy vaziyatlar va ayrim uzilishlar natijasida aviaqatnovlar ko‘rsatkichlari biroz pasaygan. Shunga qaramay, yuk tashish bo‘yicha 4,1 foiz o‘sish qayd etilgan.
Jahon savdosi va global sanoat ishlab chiqarishning o‘sishi havo transporti sanoatining rivojlanishiga ijobiy ta’sir ko‘rsatmoqda. Bozor sakkiz oy davomida barqaror o‘sishni namoyon qilmoqda.
Osiyo-Tinch okeani mintaqasidagi aviatsiya kompaniyalari oktyabr oyida yillik yuk tashish talabi 8,3 foizga oshganini xabar berdi. Yuk tashish quvvati ham 7,3 foizga ko‘paygan.
Yevropa-Osiyo yo‘nalishlari esa eng yuqori o‘sish ko‘rsatkichlarini qayd etgan. Xalqaro yo‘lovchi va yuk tashish hajmining o‘sishi nafaqat jahon savdosi, balki umumiy iqtisodiy rivojlanish uchun ham muhim ahamiyat kasb etmoqda.
