Hindistonda oila avtomobilni tantanali dafn etdi
Hindistonning Gujarot shtatidagi Amreli shahrida noodatiy tadbir o‘tkazildi. Bu haqda Zamin.uz xabar berdi.
Padarshinga qishlog‘ida yashovchi Polara oilasi o‘zlarining 12 yil davomida xizmat qilgan "Wagon R" avtomobilini tantanali ravishda dafn qilishdi. Ushbu voqea Hindistondagi "Times of India" nashrida yoritildi.
Polara oilasi avtomobilni oila uchun omad va baraka ramzi sifatida qadrlashgan. Shu sababli, uni sotish o‘rniga, katta ehtirom bilan dafn etishga qaror qilishdi.
Ular qishloq xo‘jaligi maydonida 4 metr chuqurlikdagi o‘ra qazib, avtomobilni turli diniy marosimlar bilan yerga qo‘yishdi. Ushbu tadbirda 1,5 mingdan ortiq odam qatnashdi, jumladan, ruhoniylar va diniy ulamolar ham ishtirok etdi.
Marosimning video tasvirlari ijtimoiy tarmoqlarda keng tarqaldi. Tasvirlarda avtomobil gulchambarlar bilan bezatilgani, diniy duolar o‘qilgach, yashil mato bilan qoplangan holda yerga qo‘yilgani aks etgan.
Tadbir tashkilotchilari avtomobil egasining so‘zlarini keltirgan: "Bu mashina bizga katta muvaffaqiyat va hurmat olib keldi. Shuning uchun uni izzat-ikrom bilan dafn etdik." Marosim uchun 4 million rupiy, ya’ni 44 ming dollarga yaqin mablag‘ sarflangani ma’lum qilindi.
Mehmonlar uchun bayramona dasturxon tashkil etildi. Shuningdek, avtomobil ko‘milgan joyga kelgusida daraxt ekish rejalashtirilmoqda.
Bu ish kelajak avlodlari uchun oilaning tarixiy qadriyatlarini saqlash maqsadida amalga oshirilayotgani ta’kidlandi.
