Uch yoshli Sarvagya shaxmat tarixida rekord o‘rnatdi
Hindistonning Madhya Pradesh shtatidagi Sagar shahrida yashovchi uch yoshli Sarvagya Singh Kushvaha shaxmat tarixidagi eng yosh reytingli o‘yinchi sifatida e’tirof etildi. Bu haqda Zamin.uz xabar berdi.
U atigi 3 yosh 7 oy va 13 kunligida FIDE Rapid reytingiga kiritilib, 1572 reyting ochkosini qo‘lga kiritdi. Sarvagya sentyabr oyida o‘tkazilgan RCC Rapid Rated Cup musobaqasida ishtirok etib, 1542 reytingga ega shaxmatchini mag‘lub etdi.
Ushbu natija unga birinchi reyting ochkosini olish imkonini berdi. Shuningdek, oktyabr oyida Shri Dadaji Dhunivale Rapid Rating Open turnirida 1559 reytingga ega shaxmatchini yengib, muvaffaqiyatini davom ettirdi.
Noyabr oyida esa u Chindvara va Indore shaharlarida o‘tkazilgan turnirlarda ham g‘alaba qozonib, o‘z reytingini yanada oshirdi. Nihoyat, u 1696 reytingga ega shaxmatchini yengib, rasmiy rapid reytingiga ega bo‘ldi.
Sarvagyaning bu yutug‘i nafaqat uning oilasi uchun, balki butun Hindiston uchun katta faxrga aylandi. Uning otasi Siddhart Singh o‘z o‘g‘lining muvaffaqiyati haqida shunday dedi: “Farzandimizning dunyodagi eng yosh FIDE reytingiga ega shaxmatchi bo‘lgani biz uchun katta sharaf.
Biz kelajakda uning grossmeyster bo‘lishini istaymiz.” Avvalgi rekord 3 yosh 8 oy va 19 kunlik Anish Sarkarga tegishli edi. Endilikda Sarvagya Singh bu natijani yangilab, shaxmat olamida yangi avlodning imkoniyatlarini yanada yorqinroq namoyon etdi.
Bu yutuq yosh shaxmatchilar uchun ilhom manbai bo‘lib xizmat qilmoqda.
