Spin Boldakda janglar: aholi uylarini tark etmoqda

Pokiston va Afg‘onistonning Tolibon kuchlari o‘rtasida Spin Boldak chegara hududida yana keskin to‘qnashuvlar kuzatildi. Bu haqda Zamin.uz xabar berdi.

Har ikki tomon sulh buzilganlikda bir-birini ayblamoqda. Kechasi davom etgan otishmalar oqibatida chegara yaqinida yashovchi ko‘plab aholi xavfsizlik nuqtayi nazaridan uylarini tark etishga majbur bo‘lgan.

Qandahor viloyatidan olingan dastlabki ma’lumotlarga ko‘ra, to‘rt nafar afg‘on fuqarosi halok bo‘lib, Pokiston tomoni uch kishi yaralanganini ma’lum qilgan. Hozircha otishmalar to‘xtagan bo‘lsa-da, hududda vaziyat barqarorlashgani yo‘q.

Mahalliy aholi janglar qayta boshlanishidan xavotirda. Pokiston hukumati Tolibonni sulhni buzib, o‘q uzishda ayblab, bunga munosib javob berilganini ta’kidladi.

Tolibon esa o‘z hududi xavfsizligini ta’minlash uchun choralar ko‘rganini ma’lum qildi. Ijtimoiy tarmoqlarda tarqalgan videolarda odamlarning piyoda yoki mashinalarda hududni shoshilinch ravishda tark etayotgani aks etgan.

Mazkur to‘qnashuvlar ikki oy avval Qatar va Turkiya vositachiligida erishilgan sulhdan keyin yana keskinlik kuchayganini ko‘rsatmoqda. O‘sha paytda tomonlar sulhni saqlashga kelishib olgan edi, biroq to‘liq tinchlikka erishish imkoni bo‘lmagan.

So‘nggi voqealar esa chegara hududida vaziyat hali ham nihoyatda beqaror ekanini yana bir bor tasdiqladi.