Afrika pingvinlari ochlik va baliq ovlash qurboni bo‘lmoqda
Afrikaning janubiy qirg‘oqlarida 60 mingdan ortiq pingvin ochlikdan halok bo‘lgani aniqlangan. Bu haqda Zamin.uz xabar berdi.
Ushbu hodisaning asosiy sabablari global iqlim o‘zgarishi va ortib borayotgan baliq ovlash tufayli sardina baliqlarining keskin kamayib ketishidir. Bu haqda The Guardian xabar berdi.
2004–2012-yillar davomida Janubiy Afrikaning muhim ko‘payish hududlari hisoblangan Dassen va Robben orollarida pingvinlar soni 95 foizdan oshiq kamayib ketgan. Umuman olganda, so‘nggi 30 yil ichida Afrika pingvinlari populyatsiyasi deyarli 80 foizga qisqargan.
Olimlarning ta’kidlashicha, pingvinlar ko‘pincha tullash davrida ochlikdan nobud bo‘lmoqda. Tullash jarayoni taxminan 21 kun davom etadi va bu vaqt ichida ular suvga kira olmaydi.
Shu sababli, bu jarayondan oldin yaxshi semirishlari zarur, aks holda omon qolishlari qiyinlashadi. Pingvinlarning asosiy ozuqasi hisoblangan Sardinops sagax sardinasi soni 2004-yildan beri maksimal darajaning atigi 25 foiziga tushib qolgan.
Suv harorati va sho‘rlanish darajasining o‘zgarishi baliq populyatsiyasining kamayishiga olib kelmoqda. Shunga qaramasdan, mintaqada baliq ovlash hajmi kamaymagan.
2024-yilda Afrika pingvinlari “o‘ta xavf ostidagi tur” sifatida tasniflangan. Hozirda ko‘payish qobiliyatiga ega juftliklar soni 10 mingdan ham kamni tashkil etmoqda.
Bu esa ularning biologik saqlanib qolishi uchun jiddiy xavf tug‘diradi.
