Indoneziyada suv toshqinlari 1317 kishini hayotdan olib ketdi
Indoneziyaning Sumatra orolida yuz bergan kuchli suv toshqinlari va ko‘chkilar oqibatida halok bo‘lganlar soni keskin oshdi. Bu haqda Zamin.uz xabar berdi.
Rasmiy ma’lumotlarga ko‘ra, tabiiy ofat 1317 kishining hayotiga zomin bo‘lgan, yana 588 kishi bedarak yo‘qolgan. Bu haqda mamlakatning Tabiiy ofatlarni boshqarish milliy agentligi ma’lum qildi.
Ofat oqibatlari og‘ir bo‘lib, uch mingdan ortiq odam jarohat olgan. Sel oqimlari ko‘plab turar joylarni, yo‘l infratuzilmasini va muhim muhandislik inshootlarini vayron qilgan.
Qutqaruvchilar eng ko‘p zarar ko‘rgan hududlarga yetib borishda qiyinchiliklarga duch kelmoqda. Mutaxassislarning fikricha, bu halokatli ofatlar bir hafta davom etgan uzluksiz yomg‘irlar natijasida yuzaga kelgan.
So‘nggi ikki hafta ichida Janubiy va Janubi-sharqiy Osiyoda kuzatilgan suv toshqinlari va ko‘chkilar oqibatida 1500 dan ortiq inson hayotdan ko‘z yumgan, qariyb 11 million kishiga zarar yetgan. O‘zbekiston Tashqi ishlar vazirligi Indoneziyada sodir bo‘lgan tabiiy ofatlar paytida o‘zbekistonliklar orasida jabrlanganlar yo‘qligini ma’lum qildi.
