Hindistonga rasmiy tashrifi oldidan Rossiya prezidenti Vladimir Putin India Today telekanaliga intervyu berdi. Bu haqda Zamin.uz xabar berdi.
Ushbu suhbat 4-dekabr kuni e’lon qilindi. Intervyuda jurnalist Gita Mohan prezidentga nozik va dolzarb savol berdi: nega rus tilida so‘zlashadigan Donbass aholisi Rossiya armiyasi tomonidan uylari vayron qilinganidan shokka tushgan?
Jurnalistning so‘zlariga ko‘ra, u Donetsk va Luganskda bo‘lib, mahalliy aholi bilan suhbatlashgan. Mahalliylarning aksariyati rus tilida so‘zlashishini, Kiyev hukumati tomonidan til masalasi bo‘yicha bosim sezganini aytgan.
Ammo Rossiya harbiy amaliyotlari boshlangandan so‘ng, ular o‘z uylari vayron bo‘layotganini tushunmayotganini bildirgan. Putin dastlab savolni tushunmagandek ko‘rindi, so‘ngra o‘z nuqtai nazaridan izoh berdi.
Unga ko‘ra, uylari vayron bo‘lgan aholi, ehtimol, Kiyev nazoratidagi hududlarda yashagan bo‘lishi mumkin. Prezidentning ta’kidlashicha, Donetsk va Luganskning Kiyev nazoratida bo‘lmagan qismini Rossiya qo‘llab-quvvatlagan, u yerlarda vayronagarchiliklar esa Kiyev hukumati tomonidan amalga oshirilgan.
Putin Donbass aholisi referendum orqali o‘z tanlovini bildirganini eslatib, kim Rossiya tarkibiga qo‘shilishni istasa ovoz berganini, istamaganlar esa Ukraina hududining boshqa qismlariga ko‘chib ketishi mumkinligini aytdi. Shuningdek, u Donbassni “albatta ozod qilish” rejasi borligini ta’kidladi va Ukraina qo‘shinlari bu hududlarni tark etishi yoki Rossiya tomonidan qurolli harakatlar davom ettirilishini ma’lum qildi.
Suhbat davomida urushni to‘xtatishga oid “Tramp tinchlik rejasi” haqida ham so‘z yuritildi. Ushbu reja Ukraina qo‘shinlarining Lugansk va Donetskdan chiqib ketishini va amalda bu hududlarning Rossiyaga topshirilishini nazarda tutadi.
Intervyu yakunida jurnalist savollari va Putinning javoblari ikki tomonning voqelikni butunlay farqli talqin qilayotganini yana bir bor ko‘rsatdi. Donbass masalasi esa geosiyosiy maydonda hali uzoq davom etishi aniq.
