Beninda harbiylar hokimiyatni egallab oldi
Beninda siyosiy vaziyat keskinlashdi. Bu haqda Zamin.uz xabar berdi.
Mamlakat harbiylari davlat televideniyesi orqali prezident Patris Talon hokimiyatdan chetlatilganini e’lon qildi. Harbiylarning bildirishicha, Konstitutsiya amal qilishdan to‘xtatilgan, quruqlik chegaralari va havo makoni yopilgan.
Boshqaruv vaqtincha podpolkovnik Tigri Paskal boshchiligidagi harbiy kengash qo‘liga o‘tgan. Fransiyaning Benindagi elchixonasi vaziyat yuzasidan favqulodda bayonot berdi.
Ma’lum qilinishicha, prezidentning Kotonu shahridagi qarorgohi yaqinida otishma ovozlari eshitilgan. Shu sababli fransuz fuqarolariga xavfsizlik maqsadida uylarini tark etmaslik tavsiya qilingan.
O‘zini "Qayta qurish bo‘yicha harbiy qo‘mita" deb atagan guruh televideniye orqali chiqish qilib, prezident Talonni lavozimidan chetlatish haqida qaror qabul qilinganini ma’lum qildi. Shu bilan birga, Talonga yaqin manbalar prezident xavfsiz joyga o‘tkazilganini ta’kidlashmoqda.
Prezident ofisining AFP agentligiga bergan ma’lumotiga ko‘ra, vaziyatni kichik bir guruh boshqarmoqda va asosiy qo‘shin holatni nazoratga qaytarish ustida ishlamoqda. Shahar va mamlakat xavfsizligi hamon ta’minlanayotgani aytilmoqda.
Prezident Patris Talon 2016-yilda hokimiyatga kelgan bo‘lib, mamlakatda "paxta qiroli" sifatida tanilgan yirik tadbirkor hisoblanadi. U 67 yoshda va ikkinchi prezidentlik muddati 2026-yil bahorigacha davom etishi kerak edi.
Talon avvalroq lavozimini kelasi yili tark etish niyatida ekanini bildirgandi. Mazkur to‘ntarish G‘arbiy Afrikadagi siyosiy beqarorlik fonida yuz berdi.
Bungacha qo‘shni Gvineya-Bisauda prezident Umaro Sissoko Embalo ag‘darilgandi. So‘nggi yillarda Mali, Niger, Burkina-Faso va Gvineyada ham harbiy to‘ntarishlar sodir bo‘lgan.
Bu esa mintaqada xavfsizlik bilan bog‘liq jiddiy xavotirlarni kuchaytirmoqda. Endilikda Benin ham ushbu beqarorlik zanjirining bir qismiga aylangan.
Vaziyatning qanday rivojlanishi hozircha noma’lum.
