Beninda harbiy to‘ntarish urinishi muvaffaqiyatsiz yakunlandi
G‘arbiy Afrika yana siyosiy beqarorlikka yuz tutdi. Bu haqda Zamin.uz xabar berdi.
7-dekabr kuni Beninda o‘zlarini “Qayta qurish bo‘yicha harbiy qo‘mita” deb atagan guruh milliy televideniye orqali chiqish qilib, prezident Patris Talonni hokimiyatdan chetlatganini e’lon qildi. Ular podpolkovnik Tigri Paskalni vaqtinchalik rahbar sifatida ko‘rsatib, mamlakat nazoratini qo‘lga olganini da’vo qildi.
Biroq voqealar kutilganidek davom etmadi. Mahalliy manbalarga ko‘ra, to‘ntarishga bosh-qosh bo‘lgan podpolkovnik Tigri Paskal o‘z mavqeini ushlab qololmadi va qochib ketdi.
Xavfsizlik xizmatlari isyonchilarning qolgan a’zolarini izlash ishlarini davom ettirmoqda. Ayrim ma’lumotlarga ko‘ra, isyonchi guruhning bir qismi ham yo‘qolgan.
Prezident Talonning ofisidan berilgan bayonotda vaziyatga aniqlik kiritildi. Unga ko‘ra, bu faqat televideniyeni egallashga uringan kichik bir guruh bo‘lgan.
Armiya qisqa vaqt ichida mamlakatda nazoratni tiklagan, poytaxt va viloyatlar xavfsiz holatga qaytarilgan. Benin prezidenti Patris Talon 67 yoshda bo‘lib, kelasi yili ikki muddatlik faoliyatidan so‘ng lavozimni tark etish niyatini bildirgan edi.
Uning vakolat muddati 2026-yil bahorigacha davom etishi, prezidentlik saylovlari esa 2026-yil aprel oyida o‘tkazilishi rejalashtirilgan. Benindagi bu to‘ntarish urinishi qo‘shni Gvinee-Bisauda yaqinda sodir bo‘lgan prezident ag‘darilishidan ko‘p o‘tmay yuz berdi.
So‘nggi yillarda Burkina-Faso, Mali, Niger va Gvineyada ham harbiy to‘ntarishlar kuzatilgani mintaqadagi siyosiy barqarorlikka nisbatan xavotirlarni kuchaytirmoqda. G‘arbiy Afrikadagi bu holatlar mintaqadagi siyosiy muammolarning jiddiyligini yana bir bor ko‘rsatmoqda.
