Chuyda erkak kaltaklagan ayol vafot etdi
Qirg‘izistonning Chuy viloyatida ro‘y bergan oilaviy zo‘ravonlik holati jamoatchilik e’tiborini yana bir bor bu muammoga qaratdi. Bu haqda Zamin.uz xabar berdi.
Viloyat ichki ishlar bosh boshqarmasi bergan ma’lumotga ko‘ra, 47 yoshli ayol turmush o‘rtog‘idan ko‘rgan zo‘ravonlik oqibatida vafot etgan. Hodisa 4-dekabr kuni So‘quluq tumanidagi Blijniy Orol qishlog‘ida aniqlangan.
Tergov guruhi murojaat asosida voqea joyiga yetib borganida, 1978 yilda tug‘ilgan ayolning jasadi topilgan. Tanasida ko‘plab jarohatlar, ko‘karishlar va shikastlanish izlari bo‘lgan.
Marhumaning jasadi sud-tibbiy ekspertizaga yuborilgan, natijada uning o‘limiga yopiq bosh miya jarohati, miya chayqalishi va bosh terisi shikastlanishi sabab bo‘lgani aniqlangan. Tergov jarayonida ma’lum bo‘lishicha, ayol bir kun avval turmush o‘rtog‘i tomonidan kaltaklangan.
Erkak spirtli ichimlik iste’mol qilgan holatda bo‘lgan. Ushbu holat yuzasidan Jinoyat kodeksining 130-moddasi (badanga og‘ir shikast yetkazish) bo‘yicha jinoyat ishi qo‘zg‘atilgan.
1969 yilda tug‘ilgan erkak – marhumaning eri – qo‘lga olingan va vaqtincha hibsxonaga joylashtirilgan. Hozirda tergov harakatlari davom etmoqda.
Ta’kidlash joizki, oilaviy zo‘ravonlik mintaqada dolzarb muammo bo‘lib qolmoqda. Mutaxassislar bunday hodisalarni oldini olish uchun aholining huquqiy savodxonligini oshirish, zo‘ravonlikka qarshi kurashni kuchaytirish va himoya choralari ko‘rish zarurligini ta’kidlamoqda.
