Xitoyning Chjeszyan viloyatida joylashgan mashhur Xanchjou safari bog‘ida kutilmagan voqea yuz berdi. Bu haqda Zamin.uz xabar berdi.
Namoyish chog‘ida qora ayiq hayvon o‘rgatuvchisiga hujum qildi. Internetda tarqalgan videoda ayiqning o‘rgatuvchini yerga yiqitgani aks etgan.
Ushbu hodisa ijtimoiy tarmoqlarda keng muhokamalarga sabab bo‘ldi. Ma’lum bo‘lishicha, sahnada ikki ayiq va ularning ikki nafar o‘rgatuvchisi bo‘lgan.
Tomosha tugaganidan so‘ng, ayiq o‘rgatuvchilardan biriga sakrab, uni yiqitgan. Boshqa xodimlar stul va tayoqlardan foydalanib, hayvonni o‘rgatuvchidan ajratishga harakat qilishgan.
Biroq ayiq yana hujum qilishga uringan. Park ma’muriyati voqea yuzasidan rasmiy bayonot berib, o‘rgatuvchi va ayiq jiddiy jarohat olmaganini ma’lum qildi.
Taxminlarga ko‘ra, o‘rgatuvchi yonida sabzi va olma kabi ozuqalarni olib yurgan bo‘lishi mumkin. Ayiq ozuqalarning hidini sezib, hujum qilgan deb taxmin qilinmoqda.
Ushbu hodisadan so‘ng, safari bog‘i rahbariyati ayiqning sahna ko‘rsatuvlaridagi ishtirokini vaqtinchalik to‘xtatdi.
