Saudiya Arabistoni Haj va Umra vazirligi Makka va Madinadagi ikki muqaddas maskan — Masjid al-Haram va Masjid an-Nabaviyda foto va videotasvirga olishni to‘liq taqiqlash bo‘yicha qaror chiqardi. Bu haqda Zamin.uz xabar berdi.
Bu haqda vazirlikning rasmiy xabariga asoslanib, “Arabi portal” ma’lumot berdi. Yangi qoidaga ko‘ra, ushbu muqaddas joylarda mobil telefon orqali suratga olish, professional kameralardan foydalanish, videotasvirlarni yozib olish va boshqa har qanday tasvir qurilmalaridan foydalanish man etiladi.
Ushbu cheklov 2026 yilgi Haj mavsumidan boshlab rasman kuchga kirishi kutilmoqda. Vazirlikning ta’kidlashicha, bunday qaror ziyoratchilar tomonidan sodir etilayotgan ayrim noqulay holatlar va gavjum paytlarda yuzaga keladigan muammolarni oldini olish maqsadida qabul qilingan.
Tasvirga olish jarayoni ibodat vaqtida kechikishlarga, tashkiliy jarayonlarda uzilishlarga va insonlarning shaxsiy hududiga daxl qilinishiga sabab bo‘lmoqda. Cheklovning asosiy maqsadi ziyoratchilar uchun ibodat vaqtida to‘liq diqqatni jamlash imkoniyatini yaratish va muqaddas joylarda tartib-intizomni ta’minlashdan iborat.
Rasmiylarning so‘zlariga ko‘ra, bu qaror mahalliy ma’muriyatlar va xalqaro delegatsiyalar tomonidan bildirilgan tashvishlar asosida ishlab chiqilgan. Shu orqali ziyoratchilar uchun qulay va xavfsiz muhit yaratilishi ko‘zda tutilgan.
Eslatib o‘tamiz, O‘zbekistonda ham ziyoratga borishni soddalashtirish maqsadida “Haj va Umra yagona portali” ishga tushirilgan bo‘lib, fuqarolar ushbu platforma orqali onlayn tarzda navbatga yozilishlari mumkin.
