Mers: Ukrainasiz qarorlar Yevropa xavfsizligiga tahdid qiladi

2025 yil 9 dekabr kuni Berlinda o‘tgan uchrashuvda Germaniya kansleri Fridrix Mers Ukrainaga oid masalalarni Kiyev ishtirokisiz hal qilish imkoniyati borasida jiddiy xavotir bildirdi. Bu haqda Zamin.uz xabar berdi.

U bu kabi yondashuv Yevropa xavfsizligiga tahdid solishi va "diktatorlik ruhidagi tinchlik"ka olib kelishi mumkinligini ta’kidladi. Mers, Armaniston bosh vaziri Nikol Pashinyan bilan o‘tkazilgan muzokaralar yakunida, Ukraina taqdiriga doir qarorlarni Ukraina ishtirokisiz qabul qilish qanchalik noto‘g‘ri bo‘lsa, Yevropa bo‘yicha muhim masalalarni yevropaliklarsiz hal qilish ham shunchalik nomaqbul ekanini qayd etdi.

U barqaror tinchlikka faqat ochiq muloqot va tomonlarning to‘laqonli ishtiroki orqali erishish mumkinligini urg‘uladi. Shuningdek, Germaniya kansleri Londonda Buyuk Britaniya bosh vaziri Kir Starmer, Fransiya prezidenti Emmanuel Makron va Ukraina prezidenti Volodimir Zelenskiy bilan o‘tkazilgan uchrashuv haqida ma’lumot berdi.

Muloqot davomida Ukrainada tinchlikka erishish bo‘yicha aniq va amaliy yo‘llar muhokama qilingan, har bir tomon o‘z takliflarini bayon etgan. Mersning so‘zlariga ko‘ra, ushbu muloqotlar asosida yagona qo‘shma takliflar paketi tayyorlanmoqda.

Bu takliflar yaqin kunlarda AQSH rahbariyati bilan muvofiqlashtirilib, keyinchalik Moskva bilan navbatdagi muzokaralar o‘tkazilishi rejalashtirilgan. U, shuningdek, Rossiyaning urushdagi rolini ham alohida tilga oldi.

Uning fikricha, bu mojaroni aynan Rossiya boshlangan va xohlagan taqdirda, urushni qisqa vaqt ichida to‘xtatish imkoniyatiga ega. Germaniya bu jarayonning adolatli va tezkor yechim topilishi tarafdori ekanini ma’lum qildi.

Yakunda Mers sharoitlar yaqin kunlar yoki haftalarda oydinlashishini qayd etib, Yevropa rahbarlari xavfsizlik va tinchlik masalasida hushyor bo‘lish zarurligini eslatdi.