Avstriyada maktablarda hijob kiyish masalasi yana muhokama markaziga chiqdi. Bu haqda Zamin.uz xabar berdi.
Mamlakatda 14 yoshgacha bo‘lgan qizlarning maktabda hijob kiyishini taqiqlash bo‘yicha yangi qonun loyihasi ishlab chiqilmoqda. Reuters va European Pravda axborot agentliklariga ko‘ra, hukmron koalitsiya ushbu hujjatni yaqin kunlarda parlament muhokamasiga kiritishni rejalashtirgan.
Agar qonun qabul qilinsa, taxminan 12 ming nafar o‘quvchiga ta’sir qilishi kutilmoqda. Mazkur tashabbus tarafdorlari bu chora qizlarning erkinligini himoya qilishga qaratilganini ta’kidlamoqda.
Liberal Neos partiyasi rahbari Yannik Shetti maktablarda diniy majburiyatlardan holi muhit yaratilishi kerakligini aytmoqda. Shu bilan birga, o‘ta o‘ngchi Ozodlik partiyasi (FPÖ) bu taqiqni faqat birinchi qadam deb hisoblab, kelgusida uni yanada kengaytirishni taklif qilmoqda.
Biroq bu qaror jiddiy e’tirozlarga sabab bo‘ldi. Avstriya Islom diniy jamiyati taqiqni konstitutsion huquqlar va diniy erkinlikka zid deb baholadi.
Ularning eslatishicha, 2020 yilda 10 yoshgacha bo‘lgan qizlar uchun kiritilgan shunga o‘xshash taqiq Konstitutsiyaviy sud tomonidan bekor qilingan va musulmonlarga nisbatan diskriminatsiya sifatida baholangan edi.
