Qozog‘istonda KazTag agentligiga qarshi jinoyat ishi ochildi

Qozog‘iston Madaniyat va axborot vaziri Aida Balayeva mamlakatda ommaviy axborot vositalarini faqat qonun doirasida himoya qilishlarini ma’lum qildi. Bu haqda Zamin.uz xabar berdi.

U bu fikrni KazTag agentligiga nisbatan ochilgan jinoyat ishi yuzasidan izoh berar ekan, aytib o‘tdi. Ma’lum bo‘lishicha, KazTag agentligi avval Freedom Finance kompaniyasining aldangan investorlariga doir materiallarni chop etgan.

Shu sababli Freedom Finance kompaniyasi arizasiga ko‘ra mazkur jinoyat ishi ochilgan. Kompaniya KazTag tomonidan chop etilgan ma’lumotlar haqiqatga mos kelmasligini bildirgan.

Freedom Holding Corp kompaniyasining bosh direktori Timur Turlov esa jurnalistlar bilan uchrashuvda KazTag agentligi bir necha o‘nlab maqolalarni neytral yondashuvdan yiroq holda e’lon qilganini ta’kidladi. Turlovning fikriga ko‘ra, agentlik tomonidan manipulyatsiya qilishga urinishlar kuzatilgan.

U barcha dalillarni yig‘ishga harakat qilayotganini va kompaniyaning qonun doirasida harakat qilishini qayd etdi. Shuningdek, Freedom Finance kompaniyasining advokati Aleksandr Kamendrovskiy tergov organlarining passivligi qonun oldida tenglik prinsipiga zid kelishi va jamiyatning adliya tizimiga bo‘lgan ishonchini zaiflashtirishi mumkinligini ta’kidladi.

U moliyaviy bozorning qonuniy ishtirokchisi tuhmatga asoslangan maqolalarga qarshi kurashda qiyinchiliklarga duch kelayotganini qayd etdi. Shu bilan birga, qonuniylik va huquq tartibini ta’minlash o‘rniga sun’iy to‘siqlar yaratilayotganini tanqid qildi.