Ka’bada suratga olish taqiqlangani haqidagi xabarlar asossiz.

Haj mavsumida Ka’ba va Masjidun Nabaviyda surat va video olish to‘liq taqiqlangani haqida ijtimoiy tarmoqlarda tarqalgan xabarlar asossiz ekani ma’lum qilindi. Bu haqda Zamin.uz xabar berdi.

Ushbu iddaolar faqat tasdiqlanmagan manbalar va tekshirilmagan akkauntlar tomonidan tarqatilgan bo‘lib, rasmiy manbalar tomonidan tasdiqlanmagan. Rasmiy idoralar, jumladan Haj va Umra bilan bog‘liq tashkilotlar tomonidan bunday taqiq haqida hech qanday bayonot berilmagan.

Ma’lum qilinishicha, muqaddas joylarda suratga olish bo‘yicha yangi cheklovlar joriy etilmagan. Amaldagi qoidalar esa avvalgidek saqlanib qolgan: ibodat qilayotganlarga hurmat ko‘rsatish, boshqa ziyoratchilarga xalal bermaslik va umumiy tartibni buzmaslik talab etiladi.

Ushbu tartib Haj, Umra va Ramazon mavsumlarida ham amal qiladi. Internetda tarqalgan asossiz xabarlar yana bir bor tekshirilmagan manbalarga ishonishning xavfli ekanini ko‘rsatdi.

Shu bois, ishonchli va rasmiy manbalar orqali ma’lumot olish tavsiya etiladi.