Hajda suratga olish taqiqi haqidagi xabarlar rad etildi
2026 yilgi Haj mavsumi oldidan Makka va Madinadagi Masjidul Haram hamda Masjidun Nabaviyda suratga olish va video yozishga taqiq qo‘yilgani haqidagi xabarlar asossiz ekani ma’lum qilindi. Bu haqda Zamin.uz xabar berdi.
Bu haqda 8 dekabr kuni The Islamic Information nashri xabar berdi. Mazkur nashrga ko‘ra, Saudiya Arabistoni Haj va Umra vazirligi yoki boshqa rasmiy idoralar tomonidan muqaddas joylarda suratga olishga yangi cheklovlar joriy etilgani haqida hech qanday bayonot berilmagan.
Amaldagi qoidalar o‘zgarishsiz qolmoqda. Ijtimoiy tarmoqlarda tarqalgan "to‘liq taqiq" haqidagi mish-mishlar tasdiqlanmagan manbalarga asoslangan bo‘lib, ayrim ommaviy axborot vositalari tomonidan noto‘g‘ri ma’lumotlar tarqatilgan.
Ushbu xabarlarda guyo haj davrida hatto mobil telefon orqali suratga olish ham taqiqlanishi aytilgan edi. Biroq bu xabarlar rasmiy tasdiqni topmadi.
Saudiya Arabistoni hukumatining ta’kidlashicha, ziyoratlar oldidan bunday yolg‘on xabarlar internetda tez-tez tarqaladi. Rasmiylar ziyoratchilarni ehtiyotkor bo‘lishga chaqirib, masjidlarda hurmat qoidalariga rioya qilishni eslatib o‘tmoqda.
Bular jumlasiga namozga xalal bermaslik, boshqa ziyoratchilarning shaxsiy makonini hurmat qilish va tartib-qoidalarga rioya qilish kiradi. 2026 yilgi Haj ziyorati 27 maydan 4-5 iyungacha davom etishi kutilmoqda.
O‘zbekistonlik ziyoratchilar uchun Nusuk raqamli platformasi orqali tibbiy guvohnoma olish talab etiladi. Ziyorat qoidalariga amal qilish barchaga tavsiya etiladi.
